Jowai, Ïaïong 16
U President ka VPP, Bah Ardent Basaïawmoit u la ther tyngeh ïa ki seng saiñ pyrthei kiba synshar ïa ka Jylla halor ka jingpynkynriah kam ïa ki ophisar bad nongtrei ophis sha Ri-lum Garo tang namar ba ki suba ba ki dei ki nongkyrshan jong ka VPP.
“Ka ilekshon ka la dep bad mynta sdang sa ka jingpynhiar kput da ka polisi ‘transfer’ sha Ri-lum Garo bad ym ju ïohsngew hi ruh ba wat u ‘Muster Roll’ ruh un shah ‘transfer’,” ong u Bah Ardent.
Ïa kane, u Bah Ardent u la ong ha ka jingïalang kaba la pynlong halor ka phang “Ka jingpynlaitluid ïa ki paidbah ka Ri-lum Jaiñtia na ki jingshah thombor ha ka por Election’ kaba la long ha Ïawthymme, Jowai ha ka 16 tarik Ïaïong.
U la ong ruh kiba ïaleh pyrshah bad ka VPP mynta ki la sdang ban kulmar khlieh, namar baroh shi katta, rben tang ka pla tyngka ka la biang ban long MLA, MDC hynrei mynta pat, rben ka pla tyngka ruh ym pat shaniah ban ïoh long MLA namar u paidbah u la stad bad mynta ki don sa tang kawei ka atiar ba ki lah ban pyndonkam ha ka por ilekshon bad kata ka long ban shu pyntieng kohtympan bad byrngem ïa ki paidbah.
“Ngi la jop ïa kawei, mynta ngin ïakhun ban jop sa ïa kane kawei, bad lada kim don shuh kine ar ki atiar, ym don shuh da kawei pat ba kin wan sha u paidbah, bad kin wan da ka kyrdan pule bad ki paidbah ki la tip bha ka long kumno ka kyrdan pule ka jong ki,” la ong u Bah Ardent.
