Shillong, Ïaïong 16
Ki la don palat 750 tylli ki shnong ki bym pat pynïasoh surok ha Meghalaya ki la shah kynthup mynta hapoh ka Pradhan Mantri Gram Sedak Yojana PMGSY – IV, bad shen kin sa ïohi noh ïa ka surok ki ban pynïasoh ha ki shnong ki thaw.
U Symbud Myntri Rangbah ka Jylla ba khmih ïa ka tnat PWD (Roads), Bah Prestone Tynsong u la leit ban ïuhkjat ha ka thaiñ Garo Hills ban bishar ïa ki kam ba ïadei bad ki projek shna surok hapoh ka thaiñ kiba wan lyngba ka PMGSY, ki National Highway bad kumjuh ki surok ba la mang na ka Sorkar Jylla.
Haba kren ha ka Sngi Balang, u Bah Prestone u la ong kham ha shwa ka la don ka jingsuki ban pyntrei ïa ka surok PMGSY ha ka Garo Hills, hynrei mynta ka kam ka la ïaid stet bad ym duna na ki 750 tylli ki shnong ki bym pat pynïasoh surok ha baroh kine ki snem ba la leit ki la shah kynthup ha ka PMGSY-IV.
U la ïathuh ba ka tnat PWD (Roads) ka la shah bynshet ban pynkhreh ïa ki Detailed Project Report (DPR) ban khot tender bad ban pynthikna ba jingpyntreikam ïa ki projek kan long katkum ka por ba la buh, bad katkum ki kyndon ba la buh da ka Ministry of Rural Development.
U Bah Prestone u la ïaroh ïa ka tnat PWD bad ki karikor ha ka thaiñ baroh kawei ba la lah ban pynïaid ïa ka kam haduh kumba 94 percent mynta.
“Naduh ka PMGSY-I ka jingpyntreikam ka dei kaba la peit pyrman bha da ka Ministry. Hynrei ha kane ka kynti ba mynta ngi la thaw khana sah kynmaw. Ka Ministry ka la kmen bha ïa ka jingïaid ki kam bad ka jinglah treikam jong ka tnat PWD ka Jylla,” u la ong.
U Symbud Myntri Rangbah u la ïathuh ruh ba ka jingïaid jong ka kam ka long kaba hun, bad kiba bun ki Projek jong ka PMGSY-I, II bad III ki dei kiba la jan dep lut bad la khmih lynti ba baroh kin dep ha shwa ban kut une u snem bad ha u snem ban wan.
