Shillong, Ïaïong 16
U MLA ka Bharatiya Janata Party (BJP), Bah Sanbor Shullai u la ai ka jingïaroh kaba radbah ïa ka sienjam bad ka jing-lah jong ka Sorkar Jylla kumjuh ïa u Myntri Rang -bah ka Jylla, Conrad K. Sangma ban kyntiew ïa ka pule-puthi lyngba ka jingdon kiba pass jong bun ki samla pule ha ka jingïakhun ïa ka eksamin Secondary School Leaving Certificate (SSLC) ba la pynïaid da ka Meghalaya Board Of School Education (MBOSE) da kaba pynmih ïa ka kot ïarap kaba la tip kum ka “CM Impact Guide-book”.
U Bah Sanbor u la ong ba kane ka sienjam ba la shim da ka Sorkar Jylla ka la ai jingmyntoi khamtam eh ïa ki samla pule kiba wan na ki longïing kiba duna ha ka ïoh-ka kot bad ki bym lah ban leit sha ki jinghikai shimet ne ki ‘tution’.
U Bah Sanbor u la pynpaw ba kane ka jingthmu ka la pynlah ïa kiba bun ki samla pule kiba tbit ha ka jingpule ne kiba duna ka jingpule ban pas ïa ki eksamin jong ki, kaba la kyntiew shibun ïa ka jingpas jong ka Jylla baroh kawei.
“Ka jingkiew ka jingpas ka dei namar ka sienjam ba la shim da u Myntri Rangbah ka Jylla bad ngi kyrmen ba lyngba kine ki sienjam, ka jingnang jingstad jong ka Jylla kan kiew bad ngi lah ban poi sha ka thong kaba long 100% ka jingnang jingstad,” ong u Bah Sanbor.
U Bah Sanbor u la ban jur shuh-shuh ïa ka jingdonkam ban kyrshan ïa ki khynnah kiba kham tlot, da kaba kdew ba ka jingpass ïa ki eksamin klas 10 ka dei ka mawjam kaba kongsan bha na ka bynta jong ki, namar ka pynlong ïa ki ba kin lah thep ïa ki kam Sorkar na ka bynta ki kam bapher-bapher jong ka Grade-D ha ki jaka treikam ka Sorkar Jylla bad ka Sorkar Pdeng kynthup ha ki kam pulit bad ki kam shipai jong ka Sorkar Pdeng ha kaba ka kyrdan pule ba ki pan na ka bynta kitei ki kam ka long kiba la pyndep ïa ka klas 10. Haba kynthoh ïa kito kiba wad daw halor kane, na ka liang u Bah Sanbor u la ban jur ba ka jingpule kam dei ban long tang na ka bynta ki riewstad ba pawnam hynrei ka dei ban shakri ïa ki briew na baroh ki liang, khamtam ïa kiba duk.
“Ka jingpule kam dei tang na ka bynta ki riewstad bad ki riewshemphang kiba la nang la stad, hynrei ka don jingmut ruh na ka bynta kito kiba trei ha ki bynta bapher-bapher kiba kham ai jingmyntoi ïa kito kiba kham duna ha ka ïoh-ka kot,” ong u Bah Sanbor.
U la bynrap da kaba ong ba ka Sorkar MDA hapoh ka jingïalam jong u Conrad K. Sangma kum Myntri Rangbah ka la leh bha bad u la ïaroh ïa ka jingtrei shitom jong ka Sorkar ban wanrah katto-katne ki projek pynroi ha ka liang ka kam jngohkai pyrthei ruh kumjuh.
