Jowai, Ïaïong 16
Wat la ka ilekshon sha ka ïingdorbar thawaiñ jong ka Jylla ka dang jngai kumba lai snem duna, hynrei ka Voice of the People Party (VPP) ka la sdang ïa ka jingpynkhreh na ka bynta katei ka ilekshon da kaba pyrshang ban pyntikna ba ka ilekshon ha u snem 2028 kan long kaba khuid bad suba.
Ka VPP ka la rai ban ujor sha ka Election Commission of India ne ka ECI khnang ba ka Commission kan pyrkhing bha ha Ri-lum Jaiñtia, ong u President ka VPP, Bah Ardent Basïawmoit.
U Bah Ardent u la pynbna ïa kane ka rai jong ka seng ha ka jingïalang kaba la pynlong halor ka phang “Ka jingpynlaitluid ïa ki paidbah ka Rilum Jaiñtia na ki jingshah thombor ha ka por Election” kaba la long ha Ïawthymme, Jowai ha ka 16 tarik Ïaïong.
“Ngin ujor sha ka Election Commission of India ba hapoh ka Jylla Meghalaya ki don ki distrik kiba ki paidbah kim ïoh ban pyndonkam laitluid ïa ka hok thep ‘vote’ bad ka Election Commission of India ka ban pynïaid ïa ka ilekshon MLA ha u snem 2028 kan peitngor kyrpang ïa ka Jaiñtia Hills”, la ong u Bah Ardent. U la pynpaw ka jingngeit skhem ba ka ECI kan shimkhia ban pynthikna ba ka ilekshon MLA ha u snem 2028 hapoh Jaiñtia Hills kan long kaba ïaid beit ïaid ryntih bad ba yn nym don mano-mano ba pyrshang ban leh jubor ïa ki paidbah.
U la ong ba ïa ka ilekshon MDC ym shym la pynïaid da ka ECI, hynrei la pynïaid da ka Sorkar Jylla lyngba ka tnad DCA bad namarkata, ka VPP ka la dei ban mad ïa ki jingjia kiba ym kwah ban jia hynrei nangne shakhmat ryngkat bad u paidbah, ka VPP kan ïakhun haduh ba ki paidbah kin ïoh ban pyndonkam laitluid ïa ka hok ka jong ki.
“Kam mut tang namarba ngi rem ha ka ilekshon MDC na JHADC, ngin wohdaw, hynrei ngi kren namar ngi tip ba ka don ka jinglehbor, ka sakhi ka satar kaba biang,” la ong u Bah Ardent da kaba pynkynmaw ruh ïa ka jingshah rong kaba shi kynta jong uwei u ‘Polling Agent’ ha Maya Club kaba don ha Wahïajer, kumjuh ka jingjia ha Bataw bad Wapung nalor kiwei-kiwei ki jaka.
“Kam ju don ha kano-kano ka distrik kaba ki paidbah kin duh ban pyndonkam ïa la ka jong ka bor, ka iktiar, kane ka wan jia tang ha Jaiñtia Hills,” la ong u Bah Ardent.
Shuh shuh u la bynrap, “Ngin kren da kaba shai ïa ki Minister, MLA, bad MDC, ba ka VPP kan ym kren tang da ka ktien hynrei kan ïakhun haduh ban da pyllait war ïa ki paidbah jong ka Jaiñtia Hills na kiba kum kine ki kam leh jubor.”
