Jowai, Ïaïong 16
Ka Jaiñtia National Council (JNC), Western Zone ka la pynpaw ïa ka jinglyngngoh ha kaba ïadei bad ka jingthung jubor jong ka Sorkar Assam ïa u ‘Headman’ na ka jaidbynriew Karbi ha Lakaroi, ka shnong kaba don hapoh ka Jylla Meghalaya bad kaba la peit bad khmih da ka JHADC.
Halor kane ka bynta, ka JNC ha ka jingïalam u President ka Western Zone, u Hamehi Bamon ha ka 16 tarik Ïaïong ka la leit ban ïakynduh ïa u CEM jong ka JHADC, Bah Thombor Shiwat ban pan jingshai halor katei ka jingleh jong ka Sorkar Assam hapoh Ri-lum Jaiñtia.
Ka shnong Lakaroi kadei kaba hap hapoh ka jingpeit jong ka Dorbar Pyllun Lapangap kaba hap hapoh jong ka West Jaiñtia Hills District.
Ka JNC ka la lap ruh ba bun bah ki nongshong shnong ha Lakaroi ki dei na ka jaitbynriew Karbi, bad ki kot ki sla jong ki, kynthup ïa ki ID thep ‘vote’, la ai da ka Dorbar Shnong Lapangap. Hynrei, ka seng ka ïoh jingtip ba ïa ki kot ki sla la rah ïa ki kot ki sla na ka bynta ka jingthep ‘vote’ sha Assam khlem ka jingmynjur jong ka JHADC.
Kumta ka seng ka kyntu ïa u CEM ban leh ïa kaba donkam bad ban weng noh kloi ïa utei u ‘Headman’, namar ba kane ka shnong kam dei ka bynta jong ka Assam, bad kim don bor ban tuklar ïa ka khyndew ka shyiap jong ka Jylla Meghalaya,” la ong u President ka JNC Western Zone.
U la pyntip ba na ka liang u CEM ruh u la pyntikna ïa ka seng JNC ba un sa leh eiei ïa kino-kino kiba pynkheiñ ïa ki kyndon jong ka JHADC.
