Shillong, Ïaïong 16
Hynriew tylli ki klob kiba ïashim bynta ha ka I-League jong ka aïom ba la lah, ki la phah ka jingujor sha ka All India Football Federation (AIFF), halor ka jingkynnoh ba la don katto katne na ki rephri kiba la kham noh sha ka Inter Kashi FC, ha ka por ba ki pynïaid ïa ki jingïakhun jong kane ka lympung ïalehkai kaba dang shu dep.
Kine ki kynthup ïa ka Churchill Brothers, Real Kashmir FC, Delhi FC, Namdhari FC, Aizawl FC bad Sreenidhi Deccan.
Kine ki klob ki la soi lang ha shwa ban kin phah ka jingujor sha ka AIFF, ha kaba ki la pynpaw shai ïa ka jingbym hun ne bym sngewtynnad jong ki ïa ka jinglong khuid jong ki rephri ba dei ban pynïaid ïa ki jingïalehkai jong ka samoi.
Kat kum u kyrwoh jong kine hynriew tylli ki klob, ki la kubur ba ïa ka kam kaba ïadei bad ki rephri ban put ne pynïaid ïa ki jingïakhun baroh la peit bad pynïaid da kawei ka kynhun ba laitluid, ïa kaba ka AIFF kam don kano-kano ka lad ba kan bthah ne hukum ban phah pynïaid.
