Shillong, Ïaïong 16
Ka Meghalaya Industrial Development Corporation Ltd (MIDC) ka la rai ban weng bad pyndam noh ïa ka jingthmu shim jaka na bynta ban pynïeng ïa ka ‘Industrial Estate’ ha Umsiang-Mawkdoh, Ri-Bhoi District.
“Namar ki jingjia ba dang shen bad ka jingkren ka bym don nongrim ha kaba ïadei bad ka jingthmu shim jaka ha ka thaiñ Umsiang-Mawkdoh, Ri-Bhoi District, ka tnad ka la shim ïa ka rai ban weng bad pyndam noh ïa kane ka jingthmu shim jaka,” ong ka kyrwoh na ka MIDC.
Ka MIDC ka la pynshai ba ka jingthmu ban pynithuh ïa ka jaka ha ka thaiñ Umsiang-Mawkdoh ka long halor ka jinglong kaba biang ban ïaid shakhmat na bynta ban seng ïa ka jaka karkhana (Industrial Estate).
Ka la ong ruh ba ïa kane ka jaka kaba don marjan bad ka ‘Electronic City’ (ka ban sa wan) jong ka Assam, la ïohi kum ka lad ban thaw ïa ka jaka pdeng jong ki karkhana katkum ka juk mynta kaba pynleit jingmut tang ha ki karkhana kiba hap ha ka kyrdan ba jyrngam bad ba lieh-ki karkhana kiba pynneh-pynsah bad ki bym pynjaboh ïa ka mariang.
“Ka jingthmu ka long ban pyndonkam ïa kane ka jaka ba kongsan, kumjuh ban pynmih ïa ki lad ai kam ai jam kiba biang na bynta ki nongshong shnong bad ban noh synñiang sha ka jingroi ha ka ïoh ka kot jong ka Jylla lyngba ka jingkyntiew ïa ki kam karkhana bad ka jingpynmih khajna,” ong ka kyrwoh. Ka tnad ka la pynmih ruh ïa ka Expression of Interest (EOI) ha ka 7 tarik u Lber, 2025, na bynta kane ka jingthmu, bad ïa ka jingpynbna la pynmih ha ki kot khubor. Hadien kane, hynriew ngut ki nongdie ki la ïashim bynta ha kane ka kam.
“Hynrei naduh katei ka por, ka tnad ka la ïoh bun tylli ki jingkylli RTI na ki seng bapher-bapher. Katto-katne na kine ki jingpyntip ki la pynpaw ïa ki jingkam kiba bakla bad ba ïalam bakla ba la pyndep ïa ka kam ba ïadei bad ka jingshim jaka – kaba long kaba bakla,” la ong ka kyrwoh.
Halor ki khubor kiba saphriang ba ka tnad ka la dep pynlut T.100 klur haba ïadei bad ka rukom thied jaka, ka tnad ka la pynshai ba ka long kaba bakla shi kat dei bad ka mang tyngka ba shisha ba la mynjur na bynta kane ka jingthmu ka long tang hapoh 5% na ka pisa ba la pyntip bakla. Shuh shuh, ka MIDC ka la ïoh katto-katne ki shithi na ki kynhun bapher-bapher kiba pynpaw ka jingpyrshah ban seng ïa ka jaka karkhana ha katei ka thaiñ, da kaba pyrshah jur ïa kano-kano ka jingpynroi kaba kum kata.
“Kumta ka tnad ka sngew ba ka long kaba bha eh ban weng noh ïa kane ka jingshim jaka lada kam lah ban pyndonkam ïa ka jaka kum ka ‘Industrial Estate’,” ka la ong.
Na ka liang ka MIDC ka la pynpaw ba ka dang don ka jingangnud kaba khraw na ka bynta ka roi ka par kaba ïabiang lang bad kaba neh jong ka Jylla.
“Katba ïa kane ka jingthmu ba kyrpang kan ym ïaid shuh shakhmat, ka tnad kan dang wad ïa kiwei pat ki lad bad ki sienjam kiba ïadei bad ki thong ba neh jong ka Jylla ha ka liang ka karkhana bad ka ïoh ka kot,” pynkut ka kyrwoh.
