New Delhi, ïaïong:
Ha ka sien kaba nyngkong, ka ïingbishar ba ha khlieh duh ka la bthah ba ka President ka dei ban rai ïa ki bill ba la buh kyrpang na ka bynta ban bishar ïa ka da u Lat hapoh lai bnai ka jingbuh por naduh ka tarik ba la ïoh ïa kum kata ka jingpyntip.
Hadien saw sngi ba ka ïingbishar ba ha khlieh duh ka la pynbeit ïa ki 10 tylli ki bill, kiba la sah-teng bad buh kyrpang da u Lat ka Tamil Nadu u R N Ravi na ka bynta ban bishar bniah da ka president, bad buh por ïa baroh ki Lat ban leh ïa ki bill ba la mynjur da ki dorbar jylla, ïa ka rai kaba la kot haduh 415 sla la buh ha ka website naduh ki khyndiat sngi ba la leit ha ka por 10:54 mynmiet jong ka sngi Thohdieng.
“Ngi shim ba ka long kaba dei ban shim ïa ka por ba la buh da ka tnad kam pohïing… bad buh ba ka President ka dei ban shim ka ka rai halor ki bill ba la buh kyrpang na ka bynta ban bishar da u Lat hapoh ka por kaba lai bnai naduh ka tarik ba la ïoh ïa kum kata ka jingpyntip.
“Lada don kano kano ka jingpynslem palat ïa kane ka por, ki daw kiba biang kin hap ban buh jingthoh bad pynsngew sha ka jylla ba ïadei. Ki jylla ruh ki donkam ban ïatreilang bad pynjlan ïa ka jingïatreilang da kaba ai jubab ïa ki jingkylli kiba lah ban mih bad pyrkhat kloi ïa ki jingai jingmut ba la ai da ka sorkar pdeng,” ong ka ïingbishar bahakhliehduh.
Ka kynhun jong ki nongbishar kaba kynthup ïa u Justice JB Pardiwala bad u Justice R Mahadevan ha ka 8 tarik, Ïaïong ki la buh kyrpang ïa ki 10 tylli ki bill na ka bynta ban bishar bniah da ka President ha ka sien kaba ar da kaba shim ba ka long kaba be-aiñ, kaba bakla ha ka aiñ.
Khlem da pynsniew ktien, ka ïingbishar ka la ong “ha kaba u Lat u buh kyrpang ïa ka Bill ban bishar bniah da ka President bad ka President ha kajuh ka por ka khanglad ïa ka jingmynjur ïa ka nangta, kan plie lad ïa ka sorkar jylla ban pynibor ïa kum kane ka jingleh hakhmat kane ka Ïingbishar”.
Ka kyndon 200 jong ka riti synshar ka ai bor ïa u Lat ban ai jingmynjur ïa ki bill ba la wanrah ha u, ban bat ïa ka jingmynjur ne ban buh kyrpang ïa ka ban bishar bniah da ka President.
“Ki Bill, namar ba ki la sahkut ha u Lat ha ka por kaba jrong palat, bad u Lat hadien ba u la leh da ka jingbym don jingmut kaba shai ha kaba buh kyrpang ïa ki Bill ban bishar bniah da ka President, mardor hadien ba la pynbna ïa ka rai jong kane ka Kashari ha ka jylla Punjab (supra), la shim ba la mynjur da u Lat hadien ba la mynjur ïa ki ha ka la pyrkhat biang.
