Nongpoh, Ïaïong 18
Ka shlem treikam Block Mission Coordinator (BMC) jong ka SSA-SEMAM ka Umling Block Resource Center ha ka prokram kaba la pynlong ha ka Sngi Balang ha Nongpoh, ka la ïoh ban ai khusnam jingïaroh ïa 15 tylli ki skul kiba hap hapoh ka Umling Block halor ka jingïashim bynta shitrhem jong ki ban pynlong ïa ki skul kiba lait na ka jingdih bad bam duma lyngba ka prokram kaba la ai kyrteng ‘Tobacco Free Educational Institution’ (ToFEI), 2024.
Ha kane ka sngi la sam ruh ïa ka khusnam sha ki nongtrei jong ka BMC-Umling Block halor ka jinglah jong ki ban pyntrei bha ïa kane ka prokram ToFEI jong ka Sorkar Kmie kaba hap hapoh ka National Tobacco Control Programme (NTCP) ban pynlong ïa ki skul bad ki khynnah skul kiba lait na ka jingdih bad ka jingbam ïa ki jait duma bapher-bapher.
U Bah Mayralborn Syiem, MLA ka Nongpoh konstitwensi, u la wan ban ïashim bynta ha kane ka prokram kum kongsan ha ka jingdon ryngkat jong ka Ruby Z. Das, Joint Director ka District School Education & Literacy (DSEL), Ri-Bhoi District, ka Kong K.B. Jyrwa, District School Education Officer (DSEO) ka Ri-Bhoi nalor kiwei-kiwei.
Haba kren ha kane ka sngi, u Bah Mayralborn Syiem u la ai ka jingïaroh kaba kyrpang sha 15 tylli ki skul kiba la ïashim bynta ha kane ka rynsan ïalap ban pynduh jait ïa ka jingdih bad bam duna kaba dei kawei na ki daw jong ka jingkhlad jong kiba bun ki mynsiem briew bad pynpaw ïa ka jingsngewsarong ba ïalade um dei uba dih duma bad ba u ju ïalap ha man la ki jingïalang kiba u leit ban pynduh jait ïa u duma, drok bad kiwei-kiwei ki jingdih kiba sniew bad ktah ïa ka koit ka khiah.
U Bah Mayralborn Syiem u la ai ruh ka jingïaroh ïa ka BMC SSA-SEMAM Umling BRC kaba la pynlong ïa kane ka prokram ban sam khusnam sha ki skul bad ki nongtrei kiba la trei bha bad trei shitom ïa ka kam, da kaba ong ba ka long kaba donkam ban don ka jingithuh ïa ka jingtrei shitom namar lyngba kane ka jingai khusnam bad ka jingithuh, kan ai mynsiem bad pynshlur ïa ki ba kin nang lah ban dang trei shitom shuh shuh. Hynrei lada kam don ka jingithuh, kan pynduh mynsiem bad pyntlot noh ïa ki, ba kin trei ïa ki kam kiba shakhmat.
Shuh shuh, u la ïathuh ruh ba katkum ka jinglum jingkheiñ lyngba ka tnad jong ka koit ka khiah, la ïohi ba ym duna ïa kumba 60-65% ki briew, ki khlad namar ka jingpang bampong bad kiba bun na kine ki dei ki shynrang bad ka kham duna ha ki kynthei, da kaba ong ruh ba wat la ki don bun ki daw ba ki briew ki ïoh ïa ka ka jingpang bampong, hynrei kawei na kine ki daw ka dei ka jingpyndonkam ïa ki duma bapher-bapher.
