Shillong, Ïaïong 18 (UNI)
Ka jingïalang ‘High-Level’ ha ka kyrdan Sector Commander halor ka jingïatreilang hapdeng ka tnad shipai Border Security Force (BSF) bad Border Guard Bangladesh (BGB) ka la long ha BGB Border Outpost (BOP) Bijoypur, Bangladesh ha ka Sngi Palei, ong u heh ophisar ka BSF ha ka Sngi Thohdieng.
Ïa ka kynhun BSF la ïalam da u Lalit Mohan Sharma, DIG ka Sector HQ, BSF Tura, katba u Colonel Sarker Moham-mad Mostafizur Rahman, Sector Commander ka BGB Mymensingh Sector u la ïalam ïa ka kynhun ki shipai BGB.
Ha kane ka jingïa-lang, la ïashim bynta lang ruh da ki Battalion Commander bad ki Staff Officer na baroh ar tylli ki kynhun.
Ha kajuh ka por, ha kane ka jingïalang, la ïakren halor ki mat kum ki kam runar na shiliang sha shiliang khappud, ka jingwan rung be-aiñ, ka jingïasam jingtip ha ka por kaba kloi eh, bad kiwei ki mat kiba ïadei bad ka jingpynïaid kam ha ka rukom kaba paka ha khappud hapdeng ki arliang mamla.
“La pynleit jingmut ha ka ban pynkhlaiñ ïa ka jingïatreilang hapdeng ki arliang mamla, ban ïakhun lang pyrshah ïa ki kam be-aiñ na sha shiliang sha shiliang khappud, bad ban khanglad ïa ka leit ka wan kaba khlem jingbit ha shi lynter ki jaka khappud,” la ong u heh BSF.
Ka jingwan buhai shnong ki trai-ri Bangladesh ka la long ka mat kaba pynkhuslai shi kat dei ïa ki shipai BSF wat la ki shipai pahara khappud ka India ki pynneh ïa ka jingpahara kaba pyrkhing ha shi lynter khappud. Katto-katne na kitei ki nong Bangladesh, ha ryngkat ki nongïarap na India, ki la shah kem ha ki BSF bad pulit ka Jylla.
Ka Meghalaya ka ïasam ïa u pud uba 444 km bad ka Bangladesh, shi bynta kaba lait rynghang, kaba long lum, ka bym don jingker, bad kaba lah ban wan rung tuh man ka por.
Baroh ar ngut ki heh ophisar ka BSF bad BGB ki la mynjur halor ka jingdonkam ban shimkhia ïa ki jingeh kiba ïadei bad ka khappud lyngba ka jingïakren bad jingïatreilang kaba na ka por sha ka por.
Shuh shuh ka jingïalang jong ki arliang mamla ka la ban jur ba ki shipai BSF-BGB ki donkam ban ïatreilang khnang ban pynneh ïa ka jingshaniah markylliang bad ban don ka jingïatreilang ha ki kam ki jam, ka jingsuk, bad ka jingshngaiñ ha shi lynter khappud jong ka India-Bangladesh.
