Shillong, Ïaïong 18
Ka kynhun ïalehkai Indian Super League (ISL) ka FC Goa ka la pynbna ïa ka jingmih noh jong u rangïalehkai shakhmat u Armando Sadiku ha shwa ka Kalinga Super Cup 2025.
Une u rangïalehkai ka Albania, uba la pynïasoh sha ka FC Goa mynta ka samoi hadien ba u la don bynta ban jop ïa ka League Shield bad ka Mohun Bagan mynshem snem, u la thep 10 kol na 24 tylli ki jingïakhun ha ka ISL. Une u khlur nongthep kol u la lah ban thep 8 kol ha ki hynñiew sien lynter ki jingïakhun.
“Ka FC Goa bad u Armando Sadiku ki la mynjur lang ban pynkut noh ka jingïateh lok naduh mynta ka sngi,” la ong ka kyrwoh jong kane ka klob ha rynsan social media.
Hynrei u Sadiku u la ïaleh katba lah ban ïoh thep kol ha kaba kut kane ka aïom, ha kaba u la thep tang ar kol ha ki 17 tylli ki jingïalehkai kiba shadien. Ka kol ba khatduh jong u na ka bynta ka Goa ka long pyrshah ïa ka Bengaluru FC ha ka semi-final (2nd leg), ha kaba u la mih madan na jaka shong ben shuwa ba u Sunil Chhetri un thep ïa ka kol shwa ban wai.
Wat hapdeng ka jingkhriat, u Sadiku u danglong u nongïalehkai ba kongsan ha ka jingïakhun jong ka FC Goa. U la pyndep kum u nongthep kol ba bun tam na ka bynta ka FC Goa ha kane ka samoi, da kaba thep 14 kol bad ïarap pynbuh 19 sien.
Te kumta mynta ka FC Goa kan wad ki lad ki lynti ban pynkhlaiñ ïalade hashwa ba kan ïakhun pyrshah ïa ka Gokulam Kerala FC ha ka pre-quarter final jong ka Kalinga Super Cup ka ban long ha ka 21 tarik mynta u bnai.
