Nongpoh, Ïaïong 18
Ka St. Alfred Secondary School, Marngar ka la long ka lahduh na baroh tam lane ka Overall Champion napdeng 36 tylli ki skul ha kaba palat 900 tam ki khynnah skul ki la wan ban ïashim bynta ha ka District Level Inter School Athletic Meet 2025 ba lai sngi lynter bad la pynkut ha ka sngi palei ha madan ïalehkai jong ka NSCA Mini Stadium, Pahamsyiem.
Ha kane ka lympung kaba la pynlong da ka shlem treikam District Sports Officer (DSO) ka Ri Bhoi District ryngkat ka jingïatreilang bad ka Athletic Committee jong ka Ri Bhoi District Sports Association (RBDSA), ka St. Alfred Secondary School, Marngar ka la ïoh ban khur haduh khyndai tylli ki trophy kum ka lahduh ha ka Best Team jong ka U-14 ki kynthei, U-16 ki kynthei, U-18 kynthei bad shynrang nalor ki khusnam shimet lane kum kita ki nongïalehkai kiba kynsai tam.
Nalor ka St. Alfred Secondary School, Marngar, kiwei de ki skul kiba la ïoh rah ïa ka nam jop, ki kynthup ïa ka MeECL Secondary School, Nongsder ha ka U-14 jong ki shynrang, ka St. Jude Secondary School, Umpher ha ka U-16 ki shynrang lem bad ki khusnam shimet ba la ïohpdiang da ka Christian Higher Secondary School, Pahamsyiem ha ka U-14 jong ki shynrang.
Ki nongjop ïa ka nam lahduh ha kane lympung ïalehkai jong ka District, kin sa ïoh pat ïa ka lad ban dang pyntbit shuh-shuh ïalade ha kine ki khyndiat sngi ki ban sa wan na ka bynta ban ïashim bynta pat ha ka State Level Inter School Athletic Meet 2025 ka ban sa long ha ka nongbah Shillong.
Ha kane ka sngi pynhap pyrda ïa kane la lympung, la wan ban ïadon ryngkat da u Abhilash Baranwal, Deputy Commissioner ka Ri Bhoi kum u kongsan, u Naman Kumar, Additional Superintendent of Police ka Ri Bhoi, ka Kong KB Jyrwa, District School Education Officer ka Ri Bhoi,u Bah Bobby L Nongbet, DSO ka Ri Bhoi, nalor ki nongïalam ka RBDSA bad kiwei-kiwei de.
