Shillong, Ïaïong 18
U Nongïalam ka Congress, Saleng A Sangma uba dei u MP sha Lok Sabha na Tura u la pynpaw ka jingsngewkhia ïa ka jinglaitlan ban khaïi hapdeng ki briew na India bad Bangladesh ha khappud ba don ha Meghalaya.
U la ong ba ym dei tang u dewïong ba la khaïi sha Bangladesh, hynrei u la pynpaw ka jingsheptieng na ka jingjur palat ka khaïi be-aiñ na Bangladesh sha India bad kumjuh na India sha Bangladesh.
“Ki mar aïu ba ki khaïi ngim tip, hynrei kaei kaba ngi ïohi ha kine ki 3-4 snem ba la leit ka dei ïa ka jingkiew jong ki nongdih drok ha ka Jylla,” u la ong haba kren bad ki lad pathai khubor.
U la ong ba ka jingdon palat lai lak ngut ki briew kiba dih drok ha ka Jylla kam dei ka kam kai, hynrei ka dei ka kam kaba khia bha ym tang ïa ka Sorkar, hynrei ïa ki nongshong shnong ruh.
Haba pynpaw ka jingsngewkhia ïa ka jingbun ki samla ba la ngop bad kyrni ha u drok, u MP u la ong, “Ki nongshong shnong jong ngi ki dei ban tip, ki jait drok aïu ba ki khun jong ngi ki pyndonkam. Ym dei tang katta, kumno pat ïa kito kiba shah ktah na ka jingpang HIV, leit sha ki hospital bad kiwei ki jaka sumar, ki khynnah jong ngi ki ïoh ïa ka HIV.”
Haba kynthah ïa ka Sorkar halor ka jingïoh laitlan ban khaïi be-aiñ ha ka Jylla Meghalaya, u Saleng u la buh jingkylli. “Balei ka Sorkar ka ailad ïa ka kam khaïi be-aiñ hapoh kane ka Jylla jong ngi?” u la ong.
U la ong ym dei ban ïakren tang ïa ka jingkhaïi be-aiñ ïa u dewïong, dei ruh ban ïakren ïa kiwei ki kam khaïi be-aiñ ïa u mawshun ruh ne kiwei ki kam khaïi be-aiñ.
“Balei ngi ïakren shaphang ka kam tih dewïong be-aiñ, ngi dei ban ïakren ruh shaphang kiwei ki kam khaïi be-aiñ. Kita ki mar be-aiñ ba la shalan ïoh lehse ki wanrah kylliang pat da ki mar be-aiñ, ïa kata ym lah ban tip,” la ong u MP na Tura.
Haba kynthoh tyngeh ïa ka jingbym don ka jingkhynra ha ki khappud ïa ki mar be-aiñ, u Saleng u la ong, balei ym don ka jingtalasi ïa ki mar ba khaïi be-aiñ, bad pynpaw ba un hiar hi dalade sha khappud ban ïakynduh ïa ki ophisar ka tnat Custom, ki heh BSF bad ki Deputy Commissioner ban khmih kaei kaba lah ban leh na ka bynta ban khanglad ïa ka kam khaïi be-aiñ.
