Jowai, Ïaïong 18
Ka Jaiñtia National Council (JNC) Western Zone ha ka 16 tarik Ïaïong ka la kyrpad ïa ka jingtuklar jong u Chief Executive Member (CEM) ka JHADC, Bah Thombor Shiwat halor ka jingkyntait jong ki ‘Bank’ ban ithuh ïa ki kot ki sla ba la ai da ka District Council.
Katkum ka dorkhas ba la ai sha u CEM, la kdew ba ka jingkyntait jong ki ‘Bank’ ban ithuh ïa ki kot ki sla ba la ïoh na ka District Council ka la buh jingeh shibun ïa ki trai jaka kumjuh ïa ki nongshong shnong hapoh ka distrik.
Ka Seng ka la kdew ba ka JHADC ba la pynkupbor da ka ‘Sixth Schedule’ jong ka Riti Synshar ka ri India ka la ai ïa ki kot ki sla kiba donkam kum ki kot bat khyndew ne ‘Land Holding Certificate’ (L.H.C.), ‘PATTA’, ‘No Objection Certificate’ (NOC) bad ‘Non-Encumbrance Certificate’.
Hynrei, ki ‘Bank’ ki la bteng ban kyntait ne ban pdiang ïa kine ki kot ki sla kaba pyni ba ki ‘Bank’ kim kheiñ snep ïa ka bor jong ka JHADC bad kaba wanrah jingeh shibun ïa ki trai jaka kiba thmu ban shim ram na ki ‘Bank’.
“Ka jingmih na kane ka jingbym ithuh da ki ‘Bank’ ïa ki kot ki sla jong ka Council ka la wanrah shibun ki jingeh kum ha kaba shim ram na ki ‘Bank’, bad ka jingeh ha ki kam pisa ban pynrung kyrteng ïa ki jaka ha u ‘Registrar’/’Registering Officer’. Kane ka jinglong-jingman ym tang ba ka buh jingkylli ïa ka jingïoh bor jong ka District Council hynrei ka buh jingeh halor ka jinglongtrai ïa ka khyndew ka shyiap lyngba ki kot ki sla (LHC) ba la ai da ka JHADC,” ong ka JNC ha ka kyrwoh.
Kumta ka JNC ka kyrpad jur ïa u CEM ba un shimkhia mardor ban pynbeit ïa kane ka kam.
“Ngi kyntu ïa ka ophis ban bthah ïa ki ‘Bank’ ba ki dei ban ithuh bad pdiang ïa ki kot ki sla khyndew ba la ai da ka JHADC bad ban pyrkhat ban ai da ka ‘certificate’ ba kyrpang ban pynsuk ha ka ban ai ïa ka jingithuh,” ong ka kyrwoh.
Nalor kata, ka JNC ka la ban jur ba kino-kino ki ‘Bank’ kiba pyrshang ban kyntait ïa ki kot ki sla ba la ai da ka JHADC ki dei ban pynkhreh ban mad ïa ki jingeh.
Halor kane ka phang, ka seng ka la ong ba na ka liang u CEM u la pyntikna ban shimkhia mardor halor kane ka phang.
