Shillong, Ïaïong 18
Kawei ka longkmie Khasi kaba leit bylla ïing briew ha Nagpur kaba hap ha jylla Maharashtra ka la shah shoh haduh ban da mynsaw ka kti ha ka trai ïing kaba ai bylla.
Katkum ki durkhih ba la pynsaphriang la ïohi ba kane ka longkmie ka la ïam bad ud pang namar ka kti kadiang kaba la at bad mih snam.
La ïathuh ba kane ka longkmie ka dei kaba sah lang bad katei ka trai.
Ki khubor ki ïathuh ba kane ka longkmie Khasi ka dei kaba la don lok hynrei ka la leit bylla ïing briew sha Nagpur, katba u lok pat de u don ha Shillong.
La ïathuh ba kane ka longkmie ka la don ha kti ki pulit bad mynta la leit ban phah sumar ïa ka.
Halor kane ka jingjia, na ka liang ka Khasi Students’ Union, Sengkmie ka la aiti ha ki nongïalam ka KSU Delhi Unit ba kin buddien.
Haba u nonglum khubor na Shillong u la ïoh ban ïakren da ka phone ïa ka President ka KSU Delhi Unit ka samla Marbiang Khongwir, ka la ïathuh ba ka la dep ïakren bad ki pulit na Delhi hynrei ki pulit ruh ki la ai jubab ba ki shem shitom namar ka Nagpur ka la hap ha ka jingpeit ki pulit ka Maharashtra.
Ka la ïathuh ba ïa kane ka jingjia kaba biang eh ka long lada ki bahaïing ki ujor ejahar sha Meghalaya ne sha Maharashtra hynrei na ka liang ka seng ruh katba lah kin thaw ki lad ki lynti ban ai jingïarap ïa katei ka longkmie Khasi.
