Shillong, Ïaïong 20
U lok jong ka longkmie Khasi kaba shah shoh ha ka trai ïing haba ka leit bylla ïing briew ha Nagpur, Maharashtra u la bitar ïa ka mynnong (agent) kaba dei ka longkmie Khasi kaba la ïalam bylla hynrei kam don jingkitkhlieh pat ynda ka lok jong u ka la shah shoh.
Haba ïakren bad u nonglum khubor U Nongsaiñ Hima lyngba ka phone, u lok u bym kwah ban pynpaw kyrteng u la ong haba kane ka trai ïing kam sngewtynnad ïa ka nongtrei ka la dei ban pyntip ban phah leit phai noh bad phah biang da kawei hynrei kam long kaba bha pat ban shu shoh tang namar ba ka dei ka nongtrei.
U la ïathuh ba ka lok jong u ka la shah kdiah na ka kti kadiang kaba la at bad jngem snam bad don ki bynta ba la mih snam dei ba ka trai ïing ka la ksam da ka tyrsim.
Nalor kane, u la ïathuh ba kane ka jingshah shoh ka la jia ha ka miet jong ka 17 tarik mynta u bnai namar ka bakla ban pyndonkam ïa ka tiar jong ka trai bad ynda ki la bun nia ka la poi ka jingshah shoh.
U la ïathuh ba ka lok ka la mih na Maharashtra ha ka 19 tarik mynta u bnai ban leit sah noh bad u namar ma u ruh u bylla shawei ka jaka kaba don shabar ka jylla Meghalaya.
U la pyntip hadien ba ka trai ïing ka la panmap bad la ïasuk noh hakhmat ki pulit namar kim kwah ban pynjrong ïa kane ka jingïakajia namar kim don por ban leit mih hakhmat ka aiñ.
U la ïathuh biang ba ka lok jong u ka dang shu leit trei mynta tang 20 sngi namar ka dang leit mynshem bnai.
Namar bun kiba ai jingkynthoh ha social media hadien ba la saphriang ka durkhih, na ka liang u lok u la pynpaw ba ka jingleit bylla shabar ka jylla ka long ban pyndap pynbiang ïa ka ïing ka sem ban suk lashai lashisngi ynda la ïoh khun.
