Shillong, Ïaïong 20
Kawei ka kali ba la pynher sted ka la leit tynrah ïa ar tylli ki arshaka (scooty) ha ka Sngi Palei por 10:30 mynmiet hajan Bawri Mansion Junction Shillong bad phet krad shi syndon na katei ka jaka.
Ka khubor na ki pulit ka ïathuh ba katei ka kali ka dei ka EcoSport (Ford) kaba don ïa u number ML05-P-2414, ka dei kaba wan ïaid na Dhankheti sha Malki hynrei marsien poi hajan Woodland Hospital, u nongñiah u la tynrah ïa ar tylli ki arshaka bad kiwei pat ki kali.
La ïathuh ruh ba ha ka jaka ban sangeh, u nongñiah kali u la pynher ïa ka kali bad phet krad na katei ka jaka hadien ba ki briew ki la pyrta bad pyrshang ban beh ïa ka kali.
La ïathuh ba kane ka kali ka la phet noh sha Barik bad phai sha ka surok kaba rung sha Phan Nonglait (Lady Hydari) Park, ha kaba u nongñiah u la iehnoh ïa ka kali bad phet krad na katei ka jaka.
Na ka liang ki pulit ki la pyntip ba ar tylli ki arshaka kiba shah tynrah ki kynthup ïa kawei kaba don ïa u number ML05-V-5339, ba shong da u Lamjingshai Kupar Nongbet na Mawlai Mawroh bad ka ML05-R-8515 ba shong da u Asif Wahlang na Laban.
Ha katei ka jingjia baroh ar tylli ki arshaka ki la julor bad u Lamjingshai Kupar Nongbet u la mynsaw bad la pynkit sha Woodland Hospital.
Haduh ba thoh ïa kane ka khubor ym pat lapdien satia ïa u nongñiah jong ka kali EcoSport. Katkum ka jingpynrung kyrteng hapoh ka RTA, la ong ba kane ka kali ka dei jong Ruchir C Marak.
