Jowai, Ïaïong 20
Ka Ammutong Government Lower Primary School, Amlarem Block, West Jaiñtia Hills District kaba la seng naduh u snem 1947 ka la ïoh ïa ka ïingskul bathymmai kaba don 7 tylli ki kamra klas.
Ïa kane ka ïingskul bathymmai la plie ha ka 17 tarik Ïaïong da u MLA ka thaiñ, Bah Lahkmen Rymbui ha ka jingdonlang u MDC-JHADC, Bah Medeling Swer, u In-charge SDSEO Amlarem, Bah C. Lamin, ki nongïalam shnong, ‘riew rangbah ka shnong, ki nonghikai, ki kmie ki kpa bad ki khynnah skul.
Ïa kane ka ïingskul la buh maw nongrim ha u snem 2022 ha ka por ba ka skul ka rakhe ïa ka lyngkhuh dap 75 snem ne ‘Platinum Jubilee’ bad la tei ha ka jinglut kaba T.44, 78, 448/- na ka bynta ban ai ka jinghikai kaba bit bad biang ïa ki khynnah kane ka skul.
Ha kane kajuh ka sngi, u Bah Rymbui, u la plie ruh ïa ka Community Hall jong ka shnong Ammutong kaba la tei ha ka jinglut kaba T.25 lak lyngba ka Border Areas Development kaba hap hapoh ka SCA (BADP) jong u snem 2019-2020 (ADDL).
U Bah Rymbui ha ka jingkren, u la ong ba kum u nongmihkhmat ka thaiñ, u la pyrshang ban wanrah shibun ki kam pynroi bad ruh ban pynbha ïa ka pule-puthi hapoh ka konsttiwensi.
U la pyntip ruh ba hapoh ka konstitwensi, na ki 7 tylli ki snem, la don 40 tylli ki skul kiba la ïoh ïa ki ïingskul bathymmai lyngba ka jingïarap ka tnad pule puthi ka Sorkar Jylla, Border Area, MLA skhim, nalor kiwei-kiwei ki skhim Sorkar.
U la pyntip ruh ba ïa ka Hall jong ka Sub Division hapoh Amlarem kaba la thmu ban tei ha ka jinglut kaba T.3 klur 45 lak yn buh maw nongrim la kumno-kumno ha ka 30 tarik Ïaïong lane 1 tarik Jymmang, 2025 khnang ban sdang noh ïa ka jingtei kaba u paidbah ka Sub Division u la donkam bha.
Shwa kane, ka nonghikai, Kong Debora Sumer ka la ong, ka jingïoh ïa ka ïingskul bathymmai kan long ka jingkyrkhu ïa ki 77 ngut khynnah namar nangne shakhmat kin ïoh ban shong ha la ki jong ki jong ki kamra ym kumba mynshwa ba hap ban shong lang ha kajuh ka kamra.
Wat la kane ka skul ka la ïoh ïa ka ïingskul ka bathymmai, hynrei ka Kong Sumer ka la ong ba dang don shibun ki bynta kiba ka skul ka dang donkam kynthup ki ben ki des, ki miej, ki shuki, ki duli buh kot, ka paiñkhana na ka bynta ki shynrang bad kynthei, ki madan ïalehkai, kumjuh ki nonghikai nalor kiwei ki jingdonkam.
Ïa ka jingïalang la pynïaid da u Waheh Shnong ka Ammutong, Bah K. Nyalang bad la ïoh ka jingkren na u Bah C. Lamin, In-charge Sub Divisional School Education Officer (SDSEO), Amlarem bad la pynphuh pynphieng ïa ka jingïalang da ki jingrwai bad jingshad na ki khynnah bad nonghikai ka skul.
