Shillong, Ïaïong 20
Ka Hynñiewtrep National Youth Front (HNYF) Krang Circle ha kine ki khyndiat sngi ba la dep ka la leit ban khynra ïa ki kot-ki sla jong ki nongtrei bar jylla kiba trei ïa ka surok ha Krang Area bad ha kajuh ka por ka la leit ban jurip ïa ka surok kaba hap ha Krang Area namar ka jingsniew shaba palat.
Ka seng hapoh ka jingïalam u President, Bah Balansing Mawlong bad Working President, Bah Damon Shadap, ki la leit ban ujor sha ka ophis jong ka kompani shna surok ha ka 15 tarik u Ïaïong, 2025 halor katei ka surok kaba hap ha Krang Area bad dei ha ka 16 tarik u Ïaïong, 2025 ba katei ka kompani ka la sdang ban maramot ïa ka surok na ka dong Nongshiliang jong ka lad ïingmane Presbyterian Krang.
Katei ka kompani kaba la pyntrei ïa katei ka surok ka dei ba la tip kum ka Tanor Engineering and Sunshine Sawkmie Company Ltd.
