Jowai, Ïaïong 21
Ka Ribhoi District Cricket Association ka la pynliem noh ïa ka Eastern West Khasi Hills District CA da 171 run ha ka Under-16 Boys Inter District Cricket Tournament 2025 (Zone-1) kaba la long ha ka Lah Sngi U Blei ha madan Thad Mukhla Mission.
Ha kane ka jingïakhun, ka Ribhoi District CA kaba la kam trai ban tied nyngkong ha kaba ka la tied 226 run bad shah pynhap 9 wiket ha ki 50 over. U Anmol Shah u la tied 61 run na ki 71 bol, kynthup ïa 10 tylli ki ‘four’ bad u kapten Manbhalang L Marshillong pat u la tied 48 run na ki 84 bol ryngkat, kynthup ïa 7 tylli ki ‘four’. U Dabetbhalang Kharjana jong ka Eastern West Khasi Hills District CA u la shim 3 wiket ha ki 12 over.
Haba wan beh ïa ka thong, ki nongtied ka Eastern West Khasi Hills District CA kim shym la lah ban ïalehkai bha na ka daw ka jingïakhun tyngeh da ki nongkawang bol ka Ribhoi District CA bad ha kaba kut ka la tied tang 55 run bad shah pynhap 10 wiket ha ki 21 over. U Anmol Shah na ka Ribhoi District CA u la pynhap 5 wiket bad ban ïohpdiang ruh ïa ka nam Man of the Match.
Ka jingïalehkai ha ka Sngi Ba-ar kan long hapdeng ka South West Khasi Hills District CA pyrshah ïa ka West Khasi Hills District CA naduh ka por 8:30 mynstep.
