Shillong, Ïaïong 21:
Ka shlem treikam jong u Sub-Divisional Office (C), Pynursla Civil Sub-Division, Pynursla ka la pyntip sha baroh ki nongleit nongwan bad ki paidbah ba kin long kiba husiar bad peitngor bha haba ïaid ha ka surok ha ki bynta jong ka Lyngkyrdem-Laitlyngkot.
Kane ka jingkyntu na ka liang ka shlem treikam u SDO Pynursla ka long na ka daw jong ka jingpyntrei ïa ka surok ha ki bynta jong ka Lyngkyrdem-Laitlyngkot jong ka surok bah National Highway, ka pynlong ïa kane ka bynta jong ka surok ban ap ka jingma na ka jinghap khyndew/maw khamtam na ka jingwan jong ka aïom lyiur. Kumta halor kane, la kyntu ïa baroh ki nongleit nongwan kiba ïaid na kane ka surok ba kin long kiba husiar.
Shuh shuh kum ka jingïada la kyntu ïa ki nongleit nongwan ba kin shim ïa kine ki lad jingïada bad ban bud ryntih da baroh, kata ban kiar na ka leit ka wan ka bym da donkam than ha ka por ba jur u slap ne hadien ka jingjur slap.
Ban bud ryntih ïa ki ‘traffic signage’ bad ki jingbthah ba la pynmih da ki briew ba la buh khnang ban pynïaid kali jong ka kompani shna surok. Ïa ki kali dei ban da ñiah husiar bad adkar, khamtam ha ki jaka ba sharing bad jaka ba pyntrei ïa ka surok. Lada don kino-kino ki dak jingtwa ne jinghiar khyndew bad jot ka surok dei ban pyntip mardor sha ka ophis treikam jong u Block Development Officer, Pynursla C&RD Block, Pynursla lane Sub-Divisional Officer (C), Pynursla Civil Sub-Division, Pynursla. Kumjuh ruh ban bud ryntih ïa ki jingpynbna paidbah kiba shaniah bad ba la pynmih da ka Sorkar na ka bynta kino-kino ki jingpyntip ba donkam lane lada don kano-kano ka jingkhang ne jingpynïaid lait ïa ka surok.
