Shillong, Ïaïong 21
Ka WAVES 2025 ka la pynbna ïa ki nongïashim bynta kiba la poi sha ka phainal jong ka ‘Animation Film Makers Competition’ (AFC) kaba long kum shi bynta jong ka ‘Create in India Challenge Season-1’.
Haba ïadei bad kane, u samla Khambor Batei Kharjana na Meghalaya u la shah jied kum uwei na ki 42 ngut kiba la poi sha ka phainal ha ka ‘Animation Film Makers Competition’ (AFC) jong ka WAVES 2025, na bynta ka projek jong u kaba la tip kum ka “Lapalang: A Khasi Folklore Reimagined”, shi bynta jong ka ‘Create in India Challenge Season-1’.
Haba ïasam ïa ka jingsngewkmen jong u, u samla Kharjana u la ong, “Nga ainguh ïa U Jisu Khrist na bynta ka ‘WAVES’, ka la long ka jingjia kaba sngewtynnad bha! Ki jinghikai na ki ‘riewshemphang jong ka ri bad nabar-ri ki long shisha kiba kordor. Kane ka long kum ka sienjam kaba khraw shakhmat na ka bynta ka kam shna ‘Animation’ ha India. Ka jingkhang ka la plie lypa – mynta ka shong ha ngi ban shim ïa ka sienjam bad peit shano ka ïalam!”
Ki 42 tylli ki projek kiba bha tam, kiba pynleit jingmut ha ka jingïathuhkhana tynrai ha kylleng ki bynta jong ka kam ‘Animation’, kaba kynthup ïa ka jingpynwandur tynrai, ka VFX, ‘Augmented Reality’ (AR)/’Virtual Reality’ (VR), bad ‘Virtual Production’, ki la poi sha ka wat ïakhun bakhatduh.
Kine ki nongïashim bynta kiba don sap, mynta kin ïoh ïa ka lad ban pyni ïa ki projek jong ki ha ka ‘WAVE Summit’ ka ban long ha Mumbai naduh ka 1-4 tarik Jymmang, 2025.
Ki 3 ngut kiba jop kin ïoh ïa ka khusnam pisa kaba mar T.5 lak.
Ha kajuh ka por, ka jingjied ïa ki 42 ngut ki nongïashim bynta kiba la poi sha ka phainal ka dei na ka jingbishar bniah kaba la neh haduh khyndai bnai ba la ïalam da ka kynhun ‘Dancing Atoms’, ha ka jingïatreilang bad ka kynhun jong ka ‘WAVES’.
Ïa ki jingpyrshang ba aiti lut jong ki nongïashim bynta la ïoh jingïarap na ka jingstad jong ka kynhun ba donburom jong ki dkhot nongbishar napoh ka ri bad na kiwei-kiwei ki ri.
Ka jingktah ïa ka ïoh ka kot na ki projek jong ki ka long kaba kongsan, ha kaba kawei pa kawei ka phlim ‘VFX Animation’ ka lah ban pynmih ki lad ïoh kam na ka bynta 100-300 ngut ki briew.
Kumjuh, ka WAVES AFC 2025 ka pyni ïa ka jingbei tyngka kaba kongsan ha ki sap saiñdur jong ka ri India, kaba kyntiew ïa ka lad ïoh kam bad ki lad ki lynti ba don kylleng ka pyrthei.
Ka jingthmu jong ka jingïakop ka long ruh ban kyntiew ïa ki jingïatreilang hapdeng ki ri bapher bapher ban pynmih ïa ki prokram.
Shuh shuh kane ka sienjam ha kylleng ka pyrthei, kaba la kyrshan da ka tnad Information & Broadcasting bad kaba lamkhmat da ka ‘Dancing Atoms’, ka dei ka sien ka banyngkong ba baroh saw tylli ki bynta jong ka kam AVGC ba la mihkhmat hapoh kawei ka rynsan ha kum kane ka jingïakop.
Ka WAVES AFC 2025 ka la ïoh ïa ka jingïashim bynta kaba khraw da kaba ïoh kumba 1900 tylli ki jingpynrung kyrteng bad 419 tylli ki jingkyntiew kyrteng bapher-bapher na ki briew ba sngewtynnad ïa kane ka kam, ki samla pule kiba don sap, bad ki ‘riewshemphang kiba la tbit ha kylleng ka pyrthei.
Kane ka jingïashim bynta shit rhem ka pynpaw ïa ka bynta ba kongsan jong ka jingïakop ha kaba ithuh bad kyntiew ïa ki sur bathymmai hapoh ka kam shna ‘Animation’.
