Shillong, Ïaïong 21
Ki kam tuh kam thiem ki nangjur katba nangïaid kawei ka sngi sha kawei pat khamtam lei ka jingshah tuh jong ki arshaka bad ka jingshah prong tuh jong ki ïing. Kane ka la pynlong ïa ki trai ïing ne ki trai jong ki kali bad arshaka ban ym sngew shngaiñ shuh.
Katkum ka khubor kaba la ïoh na ki pulit la ong ba u Bah Yangkee Shylla u la ujor ba hapdeng ka miet jong ka 4 bad 5 tarik mynta u bnai, ki runar bym lah ban ithuh, ki la tuh ïa ka arshaka kaba don ïa u registration number ML05-V-5062, kaba dei jong u paralok jong u, u Ajay Sara na ka thaiñ 7 Mer, Upper Shillong. Kumjuh, u Chirangka B Marak u la ai ka jingujor sha ki pulit ba ha ka 16 tarik mynta u bnai, ha ka por kumba 11 baje mynstep, ki runar bym lah ban ithuh, ki la tuh ïa ka arshaka ka jong u, kaba don ïa u registration number AS18-M-7361 na ka ïew Bajengdoba ha North Garo Hills.
Na ka liang jong ka Meharika D Marak ka la ujor sha ki pulit ba ha ka 12 tarik mynta u bnai, ha ka por kumba 8.18 mynstep, ki runar bym lah ban ithuh ki la prong tuh hapoh ka ïing jong ka, kaba don ha Nongmensong, Lumshyiap, Shillong bad ban rah tuh ïa kawei ka mobile phone.
Kumjuh ruh na ka liang jong u Phillip u la ai ka jingujor sha ki pulit ba ha ka 13 tarik mynta u bnai, ki runar bym lah ban ithuh, ki la tuh ïa ka trok ka jong u, kaba don ïa u registration number NL01-AG-7397 na ka shnong Mawkhanu, Shillong By-pass ha East Khasi Hills.
Ha kawei pat ka jingjia shah tuh, u Dominic Savio Sutnga u la ai ka jingujor ba ki runar bym lah ban ithuh, ki la tuh ïa ki waiar ilektrik (electrical wires) na ki san tylli ki cottage kiba dang don hapdeng ka jingtei ha ka shnong Lumumpih kaba hap hapoh ka thanad Umsning ha Ri-Bhoi District. Ha kawei pat ka jingjia, u Lenithson T Sangma u la ai ka jingujor sha ki pulit ba ha ka miet jong ka 15 tarik mynta u bnai, uwei u briew uba la tip kyrteng kum u Dechan M Sangma ba ju khot sin Gandhi (28 snem) u la tuh kawei ka pla, kawei ka riam Garo tynrai na ka ïing sah jong u, kaba don ha Lower Bamonpara ha West Garo Hills.
Shuh shuh la ong ba ha ka step jong ka 16 tarik mynta u bnai, utei u nongujor ryngkat bad ki bahaïing jong u, ki la ïoh ban bat noh ïa utei u briew bad ruh ban kurup noh ïa ki tiar kiba la shah tuh na ka met jong u. Kham hadien, ïa une u briew la aiti noh sha ki pulit.
