Shillong, Ïaïong 21
U Myntri Rangbah ka Jylla, Conrad K. Sangma u la phah ïa ka kyrwoh sngewlem halor ka jingkhlad noh jong u Kpa Bakhuid, Pope Francis ha ka Lah Sngi U Blei, kaba dei ruh ka ‘Easter Monday’.
“Nga sngewsih jur halor ka jingkhlad noh jong U Kpa Bakhuid, Pope Francis, u shakri bashisha jong U Blei uba ka jingwanrah jingkylla jong u ka la ktah ïa ka pyrthei,” ong ka kyrwoh sngewlem na u Myntri Rangbah ka Jylla sha u Archbishop Leopoldo Girelli, u Apostolic Nuncio sha India.
Haba kdew ba la tip ïa u Pope Francis kum “U Pope jong ki Paidbah”, u Sangma u la ong ba ka jingsngewrit bad ka jinglong ba shida jong u ka la batai biang ïa ka bynta jong ka jinglong nongïalam ba kynja mynsiem ha ka por ba mynta, bad kaba sawa shabar ki kynroh jong ka Vatican.
“U la kyrshan ïa ka jingsumar bad jingïada ïa ka mariang lyngba ka kam ba ai mynsiem, ka shithi “Laudato Si'” na ka bynta ka pyrthei jong ngi,” u la ong.
“Ka jingkyrshan jong u Pope na ka bynta kiba duk, ki poiwir bad ki lanot jong ka jingshah leh bym hok ka pynpaw ïa ka jingaiti jong u kaba khlem artatien ïa ka jingleh isynei, ka burom bad ka jingkynthup lang. Ki jingpyrshang jong u haba ïadei bad ki niam, kum ka “Document on Human Fraternity”, bad ka jingkyrshan jong u ïa ka jingsuk ha ki jaka ba don ka jingïaleh, ka la tei ïa ki jingkieng jong ka jingsngewthuh jingmut bad jingïatylli hapdeng ki jingïapher la ka long ha ka liang ka niam bad kolshor,” ong u Myntri Rangbah. U Sangma u la ong ruh ba ka pateng u Pope Francis halor ka jingsngewrit, ka jingkmen bad ka hok kan ïaineh, bad kan lam lynti sha ka pyrthei kaba kham don jingieid bad jingsuk.
“Na ka liang jong nga, bad ki paidbah ka Meghalaya, nga ai ka burom kaba khraw ïa u Pope Francis na bynta ka jinglong nongïalam bad jingshakri ba phylla jong u,” u la ong da kaba bynrap, “Ai ba ka mynsiem jong u kan ïoh ka jingjah thait ha ka jingsuk bymjukut.
