Shillong, Ïaïong 21
Ka Nongmynsong Sports & Cultural Club ka la ïoh jaka ban ïalehkai ha ka Second Division Football League naduh ka aïom ban wan ka ban pynlong da ka Shillong Sports Association (SSA).
Kane ka la wan hadien ba ka la lah ban khlieh dor da kaba thied ïa ka jaka kaba thylli ha ka dor T.2.30 lak hadien ba ka SSA dangshen ka la pynbna ban lilam noh ïa katei ka jaka kaba thylli. Te kumta ka Nongmynsong S&CC ka la wan kham hadien lai bad saw tylli ki kynhun kiba la phah ïa la ka jingtyrwa.
Ïa kane la pynpaw da u Working President ryngkat ka jingïadon lang u Vice President bad Secretary ka SSA, Bah Robert Dkhar, Bah Cliff R. Nongrum bad Bah D.L Nongbri hadien ba ki la dep ban bishar bad khmih bniah ïa ki kot ki sla ba donkam.
Kane ka jinglait thylli jong kawei ka jaka ha ka Second Division ka la jia long ha ka samoi ïalehkai ba la dep jong mynshem snem, hadien ba ka kynhun ïalehkai ka Nongkseh SC, ka la thied noh pat ïa kawei ka jaka kaba lait ha ka First Division.
Te kumta khnang ban lah ban pynbiang ïa ka jingdon jong ki kynhun ha manla ki kyrdan ïalehkai (division), ka SSA ka la shim ïa ka sien jam ba kan pynsaphriang ïa kane ka jingpyntip tang sha ki klob kiba la pynïasnoh bad ka, ha kaba ka Nongmynsong (kaba don ha ka Third Division) ka la long ka kynhun kaba la lah ba kan khlieh ïa la ka dor na ka bynta kane ka jaka kaba ka jingdon ki klob baroh ka la biang pura sha 14 tylli.
