Jowai, Ïaïong 22
Ka South West Khasi Hills District CA ka la ïoh jingjop ha ka Under-16 Boys Inter District Cricket Tournament 2025 (Zone-1), hadien ba ka la pynliem noh ïa ka West Khasi Hills District CA da 56 run ha ka Sngi Ba-ar.
Ha kane ka jingïakhun ka West Khasi Hills District CA kaba la jop kynting pisa, ka la jied ban kawang bol nyngkong. Te kumta ka South West Khasi Hills District CA ka la tied 138 run bad shah pynhap baroh ki nongtied ha ki 37.5 over. U Phrangborlang Syiemlieh u la lehkai bha da kaba u la tied 53 runs na ki 85 bol, kynthup ïa 7 tylli ki ‘four’ lem bad u Phibanaibor Ïawphniaw (C) uba la ïoh 17 run na ki 39 bol lem bad 2 tylli ki ‘four’. U Elvinson Nongsiej jong ka West Khasi Hills District CA u la shim 4 wiket bad 3 wiket na u Pynskhemlang Nongsiej.
Namar ka jingpynthut u slap, la hap ban pynduna ïa ki over ban beh ïa ka thong na ka 50 sha ka 45 over bad ka thong ba thymmai ka long 133 run namar ba la pyndonkam da ka DLS Method.
Te kumta ka West Khasi Hills District CA haba wan beh ïa kane ka thong, ki nongtied jong ka kim shym la lah ban shan na ka daw ka jingtbit jong ki nongkawang bol ka South West Khasi Hills District CA bad ki la shah pynhap uwei hadien uwei, lait noh na u Leadest Son uba la tied 42 run na ki 58 bol na ka bynta ban pynlong ïa kane ka kynhun ban ïoh 76 run bad shah pynhap 10 wiket ha ka 29.5 over. U Steviericson Ïawphniaw jong ka SWKHDCA uba ïoh ban pynhap 6 wiket ha ki 4.5 over, u la ïohpdiang ïa ka nam Man of the Match.
Ka jingïalehkai ha ka Sngi Balang kan long hapdeng ka SCA ‘A’ pyrshah ïa ka SCA ‘B’ ha ka por 8:30 baje mynstep.
