Ki jingkylla kiba ju angnud da ki paidbah ban ïohi hapoh ka jylla na uwei u snem sha uwei u snem ki shu kut beit tang ha ki jingphohsniew. Ki jingkular bad jingkren ban wanrah jingkylla ruh imat ki treikam tang ha ki por ïalap ilekshon. Lada ngi phai sha ki jinglong-jingman jong ki lynti syngkieñ hapoh ka jylla, hooid ngim lah ban len, ba kat nangïaid ki snem ka jingmih jong ki surok thymmai ruh ka la long shaid shaid hynrei haba peit pat ïa ka jylla ka i neh kumjuh bad shu pher kai tang ha ki katto katne ki bynta.
Ngi la ïohsngew naduh ki bun bun tylli ki snem kiba la leit ba ngin sa ïoh noh ïa kata ka surok ‘fly-over’ ha nongbah Shillong ba kan lah pat ban weng ïa ka dheng kali kaba la dei kawei na ki dawbah kaba la pynsohsat shi katdei eh ïa ki nongleit jingleit. Wat lada la ïaid da ki snem, kita ki jingangnud bad khmih lynti ruh ki shu ïaid lang tang ha ki jingkhmih lynti. Ym pat ïohi dak satia haduh mynta. Haba ngi phai pat sha kiwei ki jylla jong ka Ri, ngi ïohi ba ki jingkylla khamtam ha ka liang ka surok ki long shisha kiba sted. Haba phai sha ki surok kaba ngi ju ïaid tang ha nongbah Guwahati ne surok sha Airport, ngi shem ba lada ngi leit tang hadien katto katne bnai, ki la kylla lut. Lada phai kum sha Tamil Nadu ne kiwei ki jylla ruh, ki surok tang ha ki katto-katne bnai ki kylla lut, haduh ba teng-teng ngim ithuh shuh ne ka pynartatien ban ïaid.
Haba phai sha Meghalaya, hooid wat la ki surok thymmai ki mih, hynrei haba peit pat ïa ki projek surok, ka shim por palat da ki snem ki snem. Teng-teng ka shimpor wat da ki san snem ne shiphew snem ban pyndep ïa kawei ka projek surok. Te ngin khmih lynti kumno keiñ ïa ki jingkylla. Hooid ngim lah ban len ba ki don ki projek kiba ka Sorkar ruh ka kwah ban trei pynsted ïa ka kam hynrei hap ban sngewthuh pat ba ha ki bynta ruh ki don bun pat ki jyrwit-jyrwat ne ki diengpyngkiang ne ki jingshah pynthut na kiba bun ki liang. Kawei ka daw ruh ka dei ba ka khyndew kam dei satia jong ka Sorkar. Kumta ka shim bun ïa ka por na ka bynta kawei ka projek, kata tang ban ïoh jaka bad siew ïa ka bailutksan ruh ka la shim por da ki snem. Haba peit ïa ka jingpyntrei ïa ki projek surok sha kiwei ki jylla, lah ban ïohi ba ka kam ka ïaid ka sted, bad ym tang ka jingbun ki nongtrei hynrei wat ki kor ki bor shna surok ruh ki ïaid shaid shaid.
Ka jingkylli kaba kum ki paidbah ki ju pynpaw ka long balei ki projek surok hapoh ka jylla ki shimpor da ki bun tylli ki snem ban dep, wat la kim da dei kita ki projek kiba heh. Ka surok hi ka long u budlum jong ka ïoh ka kot bad ka jingkiew jong ki jylla ruh ka wan haba ki don ïa ki surok kiba heh bad ba bha. Ka Meghalaya ka dei ka jylla kaba long lum bad kumta kan shem jingeh ban ïoh ïa ki surok kiba heh kumba long sha kiwei pat ki jylla. Ngi ïohi ha kiwei ki jylla, ka jingsted jong ka jingmih ki surok ‘fly-over’ ka dei namar ki la don lypa ka surok kaba heh bad ka suk ban pynïaid ïa ka kam. Haba phai ha nongbah Shillong, ki surok ki long kiba rit, kumta ngi lah ban sngewthuh ba kan long kaba eh ban ïoh bun ki ‘fly-over’ namar tang u paia ban pynïeng hapdeng surok ruh u la bam jaka lypa. Ngi ieh ha ka jingstad jong ka Sorkar ha kano ka dur kan pynïaid shakhmat ïa kane ka kam bad ruh ba kum ki paidbah nongshong shnong lano kin ïoh ban sakhi ïa kata ka surok ‘fly-over’ kaba nyngkong eh.
