Florida, Iaiong:
Ka liengsuiñ jong ka Delta Air Lines, ka la kem ding ha ka tarmac ha ka Kad Liengsuiñ jong ka Orlando International Airport ha ka Sngi Nyngkong. Hadien kane ki nongleit nongwan ki la hap ban mih noh lyngba ki ‘Emergency Slide’ lane ki jaka mih ba kyrkieh.
Katkum ka kaiphod na ka Federal Aviation Administration bad ka Delta Air Lines, la ong ba katei ka liengsuiñ kaba leit sha Atlanta, ka dang shu mih sha ka jaka iaid liengsuin, ha kaba kawei na ki ar tylli ki kor engine jong katei ka liengsuiñ, ka la kem ding kynsan.
Ka FAA, ka la pynlong ia ka jingtohkit halor katei ka jingjia, kaba la pynlong ia ka bol jong ka ding, kaba la mih na katei ka engine kaba sha ka diang, kumba la ioh ban ring dur da ka mobile phone jong uwei u nongleit nongwan ha ka terminal.
Ki don 282 ngut ki nongleit nongwan kiba don ha katei ka liengsuiñ, hynrei ka long kaba donbok ba ym shym la don mano- mano ruh ba mynsaw ha katei ka jingjia.
Katei ka kompeni liengsuiñ ha katei ka sngi ka la kren sha ki paidbah bad pyntip ba ka dap da ka jingsngewnguh ia ka jingiatreilang jong ki nongleit- nongwan bad ka panmap ruh na ka bynta ka jingshem ba sniewbok ha katei ka sngi. Hynrei ka la ong ba kam don kaei- kaei ruh kaba kham kongsan ban ia ka jingshngaiñ ia ki paidbah nongleit nongwan jong katei ka kompeni bad ki kynhun jong ka Delta kin trei shitom ban pynpoi kloi katba lah ia ki nongleit- nongwan sha ki jaka ba la thmu.
Kumta la ong ba ka Delta kan pynkit ia ki nongleit- nongwan sha ki jaka ba ki dei ban leit poi, da kiwei pat ki liengsuiñ katba ki kynhun wad bniah ki dang peitbniah bad wad ruh ia ka daw jong ka jingkem ding katei ka liengsuiñ ha katei ka jingjia.
