Nongpoh, Ïaïong 22
Ki pulit jong ka Ri Bhoi District ha ka jingkhynra kaba la pynlong ha ka janmiet Lah Sngi U Blei ka 21 tarik u bnai Ïaïong, 2025, ha kawei ka ïingwai kaba don ha 15 Mer Byrnihat, ki la ïoh ban kem noh ïa u Finance Secretary jong ka seng lehnoh na ka jylla Manipur, kaba la tip kum ka Kangleipak Communist Party (KCP) – People’s War Group (PWG).
Utei u lehnoh uba la shah kem ha ki pulit Ri Bhoi dei uba la tip kyrteng kum u Khundongbam Herojit Meitei bad u dei uba la ju don bynta ha ki kam dawa pisa ha ka jylla Meghalaya bad kiwei kiwei bad uba la phet rieh na ka kti jong ki pulit ka jylla Manipur. La ïathuh ruh ba ha ka jingtohkit jong ki pulit, u Khundongbam u la phla ba u dei u dkhot jong ka KCP-PWG bad u ju khrong pisa na ka bynta ka seng. Na ka met ka jong u, ki pulit ki la ïoh ban kurup ar tylli ki mobile phone ryngkat bad kiwei kiwei de ki tiar ki tar kiba ïadei bad katei ka kam beaiñ.
Shuh shuh, na ka liang ki pulit ki la pyntip ruh ba u Khundongbam u dei ruh u suba donkti ban leh ïa ki kam pyntriem ryngkat ka suhbuit bad ki lehnoh na ka ri Myanmar bad Nepal.
Kum ban shu kdew, u Khundongbam u la shah kem ha ki pulit ka jylla Manipur mynshem snem halor ka jingdon ïa ka suloi beaiñ, ha u snem 2018 ruh u la shah kem halor ka jingshalan drok ha ka nongbah Dimapur.
Halor kane ka jingjia, ki pulit ki la register case pyrshan ïa u Khundongbam ha thanat Nongpoh bad na ka liang ki bor pulit ki dang pynlong ka jingpeitngor kaba jur ban pynthikna ba ki nongpynthut ïa ka shongsuk shongsaiñ kin ngat ha ki kyndon jong ka aiñ.
