Shillong, Ïaïong 23
Ka ïingbishar Special Judge (POCSO) ka East Khasi Hills, ka la hukum ban set along 14 snem ryngkat ka kuna kaba T.10,000 ïa u nongleh beijot ïa ka khynnah ha u snem 2018 ha ka thaiñ Shella.
Une u briew uba la shah hukum set along u dei ba la tip kyrteng kum Pynshngaiñborlang Wansai uba la shah pynngat ha ka kyndon 6 jong ka POSCO Act ha thanat Shella.
La ong ba lada um lah ban siew ïa ka kuna, une u runar un hap ban shong along sa 2 bnai. Ka ïingbishar ka la pynmih ïa kane ka hukum ha ka 21 tarik Ïaïong 2025. Ïa kane ka jingjia la tohkit da ka WPSI L Kharjana kaba don mynta ha thanat Lumdiengjri.
