Jowai, Ïaïong 23
Ka Jaiñtia National Council (JNC) ha ka Sngi Balang ka la ïoh ban bat noh ïa san ngut ki suba nong Bangla-desh na East Jaiñtia Hills hadien ba la kynnoh ba ki la wan rung beaiñ sha India khlem ki kot ki sla kiba biang.
Ka jingïoh bat ïa kine ki briew ka la wan long hadien ba ka seng hapoh ka jingïalam jong u Bah Ency Shadap, Chairman ka Employment Commi-ssion ka la pynlong ka jingtalasi ha ki bynta jong ka surok national highway-6.
“Haba pynlong ïa ka jingtohkit, kine ki suba nong Bangladesh ki la phla ba ki la wan rung sha kane ka ri lyngba ki nongïarap kiba dei ki trai shnong kiba long kum ki ‘dalal’ bad kiba la oh dor hapdeng T.1000 bad T.2000 marwei. Ka jingthmu ka jong ki, ka long ban wad jingtrei bylla hapoh ki karkhana dewbilat ha ka thaiñ Umpleng, EJHD,” ong u Bah Shadap.
Hadien kane, ka JNC ka la aiti noh ïa ki sha u heh ka tnat infiltration ha Umtyra, East Jaiñtia Hills, ban leh shuh shuh ïa kaba donkam da kaba kyntu ruh ban tohkit bniah halor kane ka phang. Na ka liang ki ophisar ruh kin leh ïa kaba donkam kynthup ka jingmudui suo mota case pyrshah ïa ki briew kiba donkti, u la ong.
Une u nongïalam ka JNC u la kynthoh jur ïa ki shipai BSF halor ka jingbym shimkhia ha kaba ïadei bad kane ka mat kaba la plie lad ïa kiba kum kine ki jingwan rung tuh lyngba ki jaka khappud jong ka ri.
Ka seng ka pynrem jur ruh ïa kine ki dalal kiba tang na ka bynta khyndiat eh ka pisa kim shym la kheiñ shuh ïa ka imlang ka sahlang bad ïa ki hok jong ka, da kaba kular ruh ban leh da kaba tyngeh lada lap ïa kiba kum kine ki briew.
U Bah Shadap u la ban jur ruh ba ka jingthaw jong ka seng ïa ka Employment Commission ka thmu ban thaw ïa ki lad ïoh kam ïoh jam na ka bynta ki samla ka thaiñ, da kaba pynpaw ruh ka jingsngew bynñiaw ba don ki dkhot nongshong shnong kiba kloi ban ïarap ban ai kam ai jam ïa ki briew kiba nabar da kaba buh ruh ïa ka jingkylli ha kaba ïadei bad ka lawei jong ki samla trai shnong lada kiba kum kine ki jingleh ki dang ïai bteng.
Ha kajuh ka por ka JNC ka maham tyngeh ïa kito ki briew kiba ai kam ai jam ïa ki briew kiba nabar, da kaba kyntu ïa ki, ba ki dei ban pyrkhat biang ïa kiba kum kine ki jingleh shwa ban dier ka por.
Ka JNC ka la kynnoh ruh ba bun bah ki briew na Bangladesh kiba shong ba sah ha ka thaiñ Umpleng, Soo Kilo bad Ladrymbai, East Jaiñtia Hills, bad ong ba shen kan sa leh ïa kaba donkam halor kane ka phang.
