Shillong, Ïaïong 23
Ki nongkitkam shnong jong ka Mawsiatkhnam ki la kyrpad ïa ki karikor jong ka tnad PWD (Roads) ba dei peit ïa ka skhim PMGSY ha ka jingdonlang u MLA ka Mawlai Bah Brightstarwell Marbaniang ba kim dei ban khang ïa kane ka surok haba ki khlem siang rong.
Kane ka jingpynpaw ki nongkitkam shnong ka dei ha ka por ba u MLA ka Mawlai Bah Brightstarwell Marbaniang, ki karikor ka tnad PWD (roads) ha jingïadonlang u MP ka Lok Sabha na Shillong constituency u Dr. Ricky AJ Syngkon ki la leit ban jurip ïa ka surok ba la shna na ka PMGSY na Mawtawar shaduh Mawsiatkhnam kaba jngai kumba 10 kilometre kaba la long ha ka 22 tarik mynta u bnai.
Ki nongkitkam shnong ki la ïathuh haba ki don ki khynnah skul kiba phong uniform haba ki mut leit phai noh sha ïing hynrei haduh 4:30 janmiet ki pulit ki khlem shah ban ïaid na kane ka surok.
Ki la ong ba lada ïa kane ka surok la khang beit wat ha ki sngi ba khlem trei ruh ka pyni ba kam dei shuh ka surok jong ki paidbah hynrei ka la dei ka surok shimet namar wat ïa ki kali kit nongpang ruh la phah ïaid shaduh Umïam.
Ki la pyntip ruh ba ha ka 21 tarik mynta u bnai ki don tang 10 ngut ki nongtrei hynrei la khang ban ïaid ki kali katba por mynmiet ki trok pat ki ïaid katba mon.
Kumjuh, ki la kyrpad ruh ïa ki karikor ka tnad PWD (roads) ba kin pynsted ban shna ïa kane ka surok namar kim nud shuh ban ïaid lada wan sa ka lyiur.
Na ka liang u MLA ka Mawlai, Bah Brightstarwell Marbaniang u la ong na ka liang ka ophis PWD ka dei ban thoh sha ka Deputy Commissioner ka East Khasi Hills District ba kan pynmih ka hukum ban ym shah ïaid ïa ki trok bad ynda la ïoh ïa ka hukum la lah ban pyntreikam hynrei ban shu khang mynta khlem ka hukum kan shem shitom ïa ki nongkitkam shnong.
Ïa kane ka surok la mang pisa T.6.85 klur ban siang rong naduh Mawtawar, Lummawsing shaduh Mawsiatkhnam. Pynban haduh mynta la dep ban siang rong haduh 3 kilometer shiteng, katba 6 kilometer tam la dep siang maw kaba sah satang ban shu siang rong noh.
