Shillong, Ïaïong 23
U Myntri ka tnat Jngohkai pyrthei ka Jylla, Bah Paul Lyngdoh u la pynrem jur halor ka jingleh riewkhlaw jong ki lehnoh ban thombor bad ban siat naphang ïa ki nongwan jngohkai pyrthei kiba leit shangkai ha kawei ka jaka jngohkai kaba don ha Pahalgam jong ka Jylla Jammu & Kashmir kaba la wanrah ïa ka jingkhlad haduh kumba 26 ngut ki mynsiem briew kaba la jia ha ka Sngi Ba-ar jong ka 22 tarik u Ïaïong, 2025.
“Ka jingbuhnud ïa ki nongwan jngohkai pyrthei kiba don bynta ha ka ban nohsynñiang sha ka khajna jong kano-kano ka Jylla, ka long kaba palat ïa ka jinglah jong nga ban sngewthuh”, ong u Bah Paul.
Haba kren sha ki lad pathai khubor, u Bah Paul u la ong ba ka Sorkar kan ïatreilang bad ka Sorkar Pdeng ban kyrshan halor ka jingpyrshang ban pynduh jait ïa ki kam lehnoh kiba leh ïa kine ki kam pyntriem ha katei ka jaka.
“Kum ka Sorkar Jylla, ka ïengskhem ban ai ka jingkyrshan ba pura ïa ka Sorkar Pdeng ban tehlakam ïa kino-kino ki kam lehnoh bad ki kam pyntriem ha katei ka jaka”, ong u Bah Paul.
Haba ïadei bad ka jingshong shngaiñ hapoh ka Jylla Meghalaya, u Bah Paul u la ong ba ka Sorkar Jylla kan ïatreilang bad ka Tnat BSF bad ban nang kham pynkhlaiñ shuh-shuh ha ka liang ka Tnat Pulit da kaba bynrap ruh ba ki don haduh lai hajar tylli ki kam pulit kiba lait hapoh ka Jylla.
U la ong ruh ba ha kito ki jaka ki bym don ka jingshong shngaiñ ïa ki nongshong shnong, ka Sorkar ka la ïakren bad ki shipai ka Sorkar Pdeng bad ki shipai BSF ban ai ïa ka jingshngaiñ kaba paka tam na ka bynta ki paidbah nongshong-shnong.
