Nongstoiñ, Ïaïong 24
Ka ophis jong ka District Programme Officer, ICDS Cell, West Khasi Hills District, ka la pynlong ïa ka Rashtrapati Poshan Pakhwada 2025 ha MCH Hospital, Nongstoiñ, halor ka phang pdeng: “Popularization of the Beneficiary Module in the Poshan Tracker” ha kaba u Bah HK Thabah, ADC ka West Khasi Hills u la long kum kongsan.
Ha kane ka prokram la kynthup ïa ka jingpynrung kyrteng Aadhaar, ha kaba palat 300 ngut ki briew ki la wan ban shon Aadhaar ryngkat ka jingpynrung kyrteng ïa ki syrnot kha bad ka jingpynsngewthuh paidbah halor ka ‘Poshan Tracker’ na ka bynta ki nongïoh jingmyntoi na ki bynta bapher bapher jong ka thaiñ Nongstoiñ bad ki jaka marjan.
Shuh shuh la pynrung ruh ïa ki nongïoh jingmyntoi na ki shnong kiba dang sah khlem kynthup bad kiba la thung sha ki Anganwadi Centre lyngba ka Poshan Tracker da ka CGHA bad ki nongtrei jong ka Nongstoiñ ICDS Project.
U Bah Thabah haba kren kum kongsan ha katei ka sngi u la kyntu ïa ki kmie bad ki longïing ban kiar na kaba bam ïa ki jingbam ba la song, ka kyiad, bad ka jingdih duma ha ka por ba pun khun, namar ka ktah jur ïa u khunlung kiba dang don hapoh ka kmie. U la ban jur ïa ka jingdonkam ban bam ïa ki jingbam kiba tei met kum ki soh, ka kait, ki jhur ki jhep ki bym khleh dawai na ka bynta ban pynbha ïa ka koit ka khiah bad ka jingroi jong ki khynnah.
U la kdew ba bun ki khynnah ha Nongstoiñ ki duna ha ka jingsan jingheh ha ka met ka phad, na ka daw ka jingbym biang ki bam kiba tei met bad kane ka khanglad ïa ka jingroi jingsan jong ki baroh kawei.
U la pynshlur ruh ïa ki paidbah ba ki dei ban pyndep ïa ka jingpynrung kyrteng Aadhaar namar ka long kaba donkam bha na ka bynta ban ïoh ïa ki skhim bapher bapher na ka Sorkar Jylla bad Sorkar Pdeng, kynthup ïa ka MHIS (Meghalaya Health Insurance Scheme), ka jingsam khaw rashon, bad ki scholarship jong ki samla pule bad kiwei kiwei de ki jingdonkam lyngba u Aadhaar card.
Shuh shuh u la pynkynmaw ba ka Sorkar Jylla ka la buh ïa ka tarik khatduh ban pynïasoh ïa u Aadhaar bad ki card rashon kan long ha ka 30 Ïaïong, 2025 bad kumta khnang ban lait na ki jingshah kyntait ïa ki jingmyntoi kiba ïoh lyngba ka Sorkar, ka long kaba donkam ïa baroh ban shon Aadhaar bad pynïasoh shuwa katei ka por kaba la buh.
Ha katei ka sngi la ïoh ruh ban sam ïa ki khusnam sha ki nongtrei Anganwadi kiba trei bha ha ki block kiba pher kaba kynthup ïa ka Kong Beltiful Nongsiej (Nongstoiñ Block) Kong Carefully Lyngdoh Mawlong (Mairang Block) Kong Badarihun Nongsiej (Mawthadraishan Block).
Ïa ki khusnam BCO kiba la leh bha tam la pynkup sha u Bah Tony Marbaniang (Nongstoiñ Block) bad ka Kong Happiness Lyngdoh (Mairang, Block), nangta la sam ruh ïa ki syrnot kha sha 5 ngut ki nongïoh jingmyntoi ha kane ka prokram.
La pynkut ïa ka prokram da ka jingkhot ïa baroh ki nongshim bynta ha ka imlang sahlang ban ïatreilang ha kaba kyntiew ïa ka koit ka khiah bad ka jingbam kaba bha lyngba ka jingtreilang bad ka jingpyndonkam ïa ki lad katkum ki kor teknoloji jong kane ka juk.
Ha katei ka sngi nalor u kongsan la donlang ruh ka Kong D Pakyntein (DSO), Dr. T Syiem (Block Medical Officer), Bah S Nongsiej (JRDO, Nongstoiñ C&RD Block), Kong B Rynjah (CDPO Nongstoiñ), Kong K Lakiang (CDPO Mawshynrut), Kong Z Kharkongor (Inspector, Food & Civil Supplies), kiwei pat nongtrei Sorkar, ki Anganwadi bad kiwei kiwei.
