Jowai, Ïaïong 24
Ka East Khasi Hills Cricket Association (EKHCA) ka la pynliem noh ïa ka West Jaiñtia Hills District Cricket Association (WJHDCA) da 167 run ha ka MCA U-16 Inter District Tournament 2025 ha ka sngi Palei ha madan Thad, Mukhla Mission.
Ha kane ka jingïakhun, ka EKHCA ka la kam trai ban tied nyngkong ha kaba ka la ïoh 217 run bad shah pynhap 10 wiket ha ki 44.2 over. U Danlyson Bareh u la tied 108 run na ki 100 bol kaba kynthup ïa 19 tylli ki ‘four’. Kumjuh u Menang Shangpliang u la ïoh 24 run na ki 30 bol (1x6s& 3x4s). Katba u Waibhami Ryngkhlem u la shim 5 wiket ha ki 9.2 over. Haba wan beh ïa ka thong, ki nongtied ka WJHDCA ki la shah pynhap uwei hadien uwei bad ïoh tang 50 run ha ki 21.2 over. U Menang Shangpliang bad Amit Kumar Rai jong ka EKHCA ki la ïoh mar 3 wiket. Ïa ka nam Man of the Match la ïohpdiang da u Danlyson Bareh jong ka EKHCA.
Ka jingïalehkai ha ka sngi Thohdieng kan long hapdeng ka SCA ‘B’ pyrshah ïa ka WKHDCA.
