Shillong, Ïaïong 24
Ka Sports Authority of India (SAI), STC Shillong kan sdang ïa ka skhim Come and Play na ka bynta ki khynnah kynthei bad shynrang ha katei ka shlem ai jinghikai na ka bynta u snem 2025-2026.
Ka jingthmu jong kane ka skhim ka long ban ai jinghikai nyngkong ïa ki khynnah kiba dangrit hapdeng ka rta 8 haduh 17 snem ban pynshlur ïashim bynta ha ki jingïalehkai bad na ka bynta ban pyndonkam hok ïa ki sap ba ki don. Te kumta da ka jingdon ïa ki jaka ïalehkai ha katei ka shlem la thmu ban pyndonkam da kaba pynshlur ïa ki khynnah ha ka imlang sahlang ban pyndonkam ïa ki sap ba kyrpang jong ki.
Kat kum ka kyrwoh ba la pyllait da u Deputy Director ka SAI, STC, Shillong u T.S.Chavhan, la ong ba ki jingïalehkai ki kynthup ïa ka Football, Athletic, Boxing, Judo bad Karate. Te kumta ïa kane ka skhim la khmih lynti ban sdang naduh ka 5 tarik u Jymmang mynta u snem.
Ïa ka aplikeshon form lah ban ïoh lyngba ka link (https://drive.google.com/file/d/1ufEJ6dpApuygl5Od7JPTmxj6vFC1bljR/view?usp=sharing) bad ki lah ban phah lyngba ka ‘hard copy’ sha katei ka shlem ai jinghikai shwa ka 30 tarik mynta u bnai bad tang kiba phah kham kloi kiba lah ban ïoh jaka ban phah ïa la ki khun jong ki.
