Shillong, Ïaïong 24
Ka lahduh jong ka Shillong Premier League, ka Shillong Lajong Football Club ka la soi haduh 8 ngut ki rangïalehkai kiba thymmai na ka bynta ban pynïasoh sha kane ka klob, hadien ba ki la pyndep ïa ka jingsoi soskular ne ka Inter Club Transfer (ICT) ba la pynlong da ka Shillong Sports Association (SSA), katba ka Sawmer SC ka la soi 7 ngut.
Kine ki rangïalehkai kiba la pynïasoh sha ka SLFC ki kynthup ïa san ngut kiba la ïalehkai na ka Nongkseh SC kaba ïalehkai ha ka First Division jong ka aïom ba la lah, katba ar ngut na ka Rangdajied United FC bad uwei na ka Nongkrem SC.
Kine san ngut kiba na ka Nongkseh ki long u Ronald Kharkongor, Mebanlamlynti Masharing, Firstborn Roy Khongsit, Willbeson Jaba bad u Terry Cosper Khongsit. Kiwei pat ki ar ngut ki rangïalehkai ka Rangdajied ki long u Mebanaibok Kharbudnah bad u Jovial Lyngdoh Lyngkhoi, katba u Wilbert Donboklang Marbaniang na ka Nongkrem SC.
Katba kawei pat ka kynhun ïalehkai SPL, ka Sawmer SC ka la wanrah ïa u Banmansoi Nongsiej na ka Nangkiew Irat SC, Hunkupar Wanñiang na ka Lumshyiap SC, Rijiedskhem Sun na ka Marbisu SC, Michaelson Kurbah na ka Nongthymmai SC, Ricky L. Mawlong na ka Lamlynti SC, Mebanskhem Kurkalang na ka Lamlynti SC bad u Pynshailang Kharsyntiew na ka Nongkrem SC.
Ha kawei pat ka liang ka Nongkseh ka la nangpynkhlaiñ da kaba ka la soi thymmai 5 ngut ki rangïalehkai, kynthup ïa u Mebankhraw K. Wahlang na ka Ryntih SC bad u Fullmoon Mukhim na ka Mawlai SC.
Ka Lawmali SC ka la soi ïa u Gabriel Blah na Lumdiengjri SC, katba ka Malki SC ka la soi ïa u Hilford Lyngkhoi na ka Sawmer SC.
Wat la ïa kane ka jingsoi soskular sha ka miej jong ka SSA ka la sdang naduh ka Lah Sngi U Blei, hynrei ha kine ki saw sngi ki la don tang 22 ngut kiba la lah pyndep ïa kane ka jingkynriah klob bad kane ka long kaba duna bha haba ïanujor bad ki snem ba la leit. Te kumta na ka liang ka SSA ka la khmih lynti ba ha kine ki sngi ki ban dang wan kin don kham bun ki ban wan shakhmat ban pyndep ïa kane ka jingsoi soskular hakhmat ka miej jong katei ka synjuk namar kan kut haduh ka 30 tarik mynta u bnai. Kat kum ki khubor la ïathuh ba ka jingdie ïa ki form ka long kumba 400 tylli na ka bynta baroh saw tylli ki kyrdan ïalehkai naduh ka Fourth, Third, Second, First Division bad haduh ka Shillong Premier League.
