Nongpoh, Ïaïong 24
U Deputy Commissioner (DC) ka Ri Bhoi District, u Abhilash Baranwal ha ka Sngi Palei u la pynmih da ka hukum ban khang mardor ïa ka jingïaid jong ki kali bad ki trok kiba kit khia palat ïa ka 9 Metric Ton lyngba ka surok Mawmaram-Nongthliew-Mawmih-Mawlyndep.
Kane ka hukum kaba la pynmih hapoh ka kyndon 163 jong ka Bharatiya Nagarik Suraksha Sanhita (BNSS), 2023 ka dei hadien ka jingïoh kaiphod na ka ophis jong u Chief Engineer bad Executive Engineer ka tnat Public Works Department (PWD), Roads kaba la pyni halor ka jingsdang orpait ka jingkieng dewbilat kaba don ha ka Dong Mawshohroh, Umbir.
Katei ka jingkieng ka dei kaba don ha ka jingjngai kaba 6 kilometer na Lad Umsaw-UCC-Mawlyndep bad ka dei kaba dang hap hapoh ka jingkhmih jong ka tnat PWD (Roads) Umsning Division bad la pyntip ba kitei ki dak orpait ki dei kiba don ha ka RS joist bad RCC deck slab jong ka jingkieng.
Katkum ka hukum kaba la pynmih, la ïathuh ba katei ka jingkieng ka dei kaba la shna ban ïaid tang ki kali kiba hapoh ka jingkhia kaba 9 Metric Ton bad ka jingïoh ïaid laitlan ki kali kiba kitkhia khamtam ki trok lyngba kane ka surok kaba jrong 41.5 kilometer ka la pynlong ïa katei ka jingkieng kaba pynïasoh na West Khasi sha Ri Bhoi ban orpait.
La ïathuh ruh ba kane ka surok ka dei kaba la shna kyrpang ban ïaid ki kali rit lane kita ki ‘light vehicles’ kiba la tip ha ka ktien phareng.
Halor kane ka bynta, ki bor pynïaid District ka Ri Bhoi, ki sngewdei ban pyrkhing bad khang noh mardor ïa ka jingïaid jong ki trok bad ki kali kiba khia palat ïa ka 9 ton khnang ban pynthikna ïa ka jingshngaiñ jong ki paidbah nongleit nongwan bad ruh ban ïada na ka jingjulor shuh shuh jong katei ka jingkieng. La maham ruh ba kino kino kiba pynkheiñ ïa kane ka hukum, kin ngat ha ka jingshah pynshitom katkum ka kyndon 223 jong ka aiñ Bharatiya Nyaya Sanhita (BNS), 2023.
Shuh shuh, la pyntip ruh ba ïa kane ka hukum yn pyntreikam mardor da ki bor pulit ka Ri Bhoi, ka tnat PWD (Roads) bad ka ophis jong u District Transport Officer ka Ri Bhoi bad kan ïai treikam tad haduh ba la pynbna pat da kumwei.
