Shillong, Ïaïong 24
U Myntri ba khmih ïa ka tnat Public Health Engineering (PHE), Marcuise N Marak u la ong ba ka PHE ka ïakynduh mawsiang ha ki katto-katne ki bynta ban pyndep ïa ka skhim sam um haduh tyngkong ïing, ka Jal Jeevan Mission (JJM) namar ba don ki kontraktor kiba la shu ieh noh shiteng ïa ka kam haba kim sngew ïohnong na ka jingtrei.
“Ka shim por ban pyndep namar ba ka sorkar ka hap ban ai biang ïa ka kam ha kiwei pat ki kontraktor,” u la ong haba kren ha ka Sngi Palei.
Katkum ka jingong u Myntri, kawei pat ka daw ka dei namar ba don ki shnong kim shym la shimti ban peit bad sumar ïa kane ka JJM hadien ba la pyndep ïa ka jingshna, bad ka PHE ka hap ban shim ïa ka jingkitkhlieh ban pynsngewthuh sha ki bor shnong halor kane.
Ha kajuh ka por u Myntri u la pynpaw ba ka JJM ka la mad ïa ka jingtynjuh kaba khraw bha namar ka jingring tyrkhong jong ki tyllong um.
U la ong ba ka tnat ka la ïaksaid bha ïa kane ka jingeh na ka jingtyrkhong ki tyllong um, bad la dep pynpaw ruh ha ka thup jong ki tyllong um ba don jingma, bad bynrap ba ka Sorkar ka la pyrshang katba lah ban leh eiei halor kane ka bynta.
Haba kren shuh-shuh halor ki jingeh ba la mad da ka tnat, u Marcuise u la ong ba na ka bynta ka kam ban buh ïa ka ‘Treatment Plant’, khlem pep kan dei ha ki jaka briew ba tnat kan hap ban ïasyllok bad ki trai jaka bad lada ki trai jaka kim mynjur ka kam ka slem noh.
“Ban pynkohnguh ïa ki trai jaka ka shim por bha. Ki don ki jingeh haba phai sha ki khlaw. Ngi donkam ïa ka NOC na ka tnat Forest, bad ïa kane ruh ngi hap ïaksaid bha,” la ong Myntri, haba pynpaw ruh ba ki don da ki kyndon ba hap leit sha ka tnat Forest ban ïoh NoC.
Ha kawei ka liang u Marcuise u la kyntait war ïa ka jingkynnoh ba don ka jingbamsap haba pyntreikam ïa ka skhim Jal Jeevan Mission (JJM) hapoh ka Jylla, ha kaba u la ong ba ka jingkynnoh ka dei tang ka jingsngewthuh bakla, bad pyntip ba ki kam ba ïadei bad ka JJM ki dang ïaid shaid-shaid.
“Ki jingkynnoh bamsap ki don, hynrei ka rukom pyntrei ïa ka JJM ka long ba shisien ba la pyndep ïa ka kam, ka don ka kynhun ba lai (third party) kaba jurip bad ai jingmut ban siew ïa ka pisa, dei tat hadien kane ba ka Sorkar kan sa ïaid shakhmat ban siew ïa ki kontraktor. Kumta, kam don satia kano-kano ka lad ban ïa bamsap,” u la ong.
Na ka liang u Marcuise u la ïathuh ba ka Jylla Meghalaya ka la ïoh por haduh u snem 2028 ban pyndep ïa ka JJM, bad pynpaw ba ka tnat kan pyrshang ban pyndep ïa kane ka skhim ha ka por ba la buh.
