Shillong, Ïaïong 24
U Nongïalam ka UDP uba dei u MLA na Nongpoh, Bah Mayralborn Syiem u la ong ba kum u MLA ka jingkhuid jong ki nongbah, ki shnong ka dei kaba ju kren hapoh bad shabar ka ïingdorbar bad ka jingkhuid-jingsuba ka dei ka jingthrang jong baroh.
Haba kren ha ka sngi Balang halor ka jingjaboh ka Byrnihat, u la ong ba ka Sorkar ka la shim ïa ki lad ki lynti ban pynthikna ban lait na ka jingjaboh.
U la ong ba ka khubor kaba shai ka dei ban poi sha ki paidbah, ba lada pom uwei u dieng dei ban thung biang 10 tylli, lada pom 10 tylli dei ban thung 100 tylli bad kumta ter-ter.
“Ka donkam ruh ban tehlakam ïa ka jingpynkhyllem ïa ki dieng bad ka jingthang khlaw, bad ban ïada ruh ïa ki um ki wahduid,” u la ong.
U la ong ba ka donkam ban ïatreilang da baroh ban ïada ïa ka mariang, ym tang ka Sorkar marwei.
“Ngi la ïohi ïa ka jingpyrshang jong ka Meghalaya State Pollution Control Board ruh, la pynkhamti ha ki ba kin peit ïa ki karkhana, khamtam ha ki ‘Industrial Estate’ ba don ha Byrnihat bad Umïam. Ha Byrnihat ka jingjurip ka la ïai bteng,” la ong u MLA.
U Bah Syiem u la ong ba ka mat ban ïada ïa ka mariang kam dei satia tang ka mat jong kawei ka Jylla, hynrei ka dei ka mat jong ka pyrthei baroh kawei.
