Shillong, Ïaïong 24
U Myntri Rangbah ka jylla, Conrad K Sangma u la pyntip ba ka Sorkar kan ïaleh ha ka ban kyntiew bad pynkhlaiñ kyrpang ïa ka kam rep kynthup ïa u shynrai Lakadong bad ki jingshna tynrai, ban kyntiew ïa ka kam jngohkai bad ïa ka roi ka par ha ki thaiñ nongkyndong.
Ïa kane u la pyntip ha ka jingïalang kaba la lum bad pynïaid da u Myntri ka Sorkar Pdeng uba khmih ïa ka Develop-ment of North Eastern Region (DoNER) u Jyotiraditya M Scindia lyngba ka ‘online’.
Haba batai khyndiat shaphang katei ka jingïalang ha ka rynsan Social Media, u Conrad u la ong, “Da kaba ïaid ryngkat bad ki jingai jingmut jong u Myntri ka Sorkar Pdeng, ngin sa nang kyntiew ïa ka jingkhlaiñ kum ïa u shynrai Lakadong bad ban pynïar ïa ki jingshna tynrai sha ki Homestay bad ki jaka jngohkai. Ngi ïeng skhem ban kyntiew ïa ki jingtei ha ki thaiñ nongkyndong ban pynbiang ïa ki surok ha ka leit ka wan ban kyntiew ïa ka kam jngohkai bad ban kyntiew kyllum ïa ka ïoh ka kot”.
Kane ka jingïalang ka dei shi bynta jong ka jingkhmih bniah halor ka Meghalaya State Vision Plan, ha kaba u Myntri Rangbah u la pyni ïa ka ‘Roadmap’ kaba ïaid bad ka jingangnud jong ka jylla ban kynjoh ka ïoh ka kot sha ka $10 billion. U la pynpaw ruh ïa ki mat kiba kongsan kiba ïadei bad ka rep ka riang, Food Processing, kam jngohkai, jingseng kam lajong bad ka jingpynsuk ïa ka leit ka wan kum ki mat kiba kongsan.
Ka Development of North Eastern Region ka la pynthikna ïa ka jingpynlong ïa katei ka jingïalang lyngba ka rynsan social media ka jong ka, da kaba ong, “U Jyotiraditya M Scindia u la lum ïa ka jingïalang bad u Myntri Rangbah ka Meghalaya u Conrad K Sangma, ki heh ophisar ka Sorkar Meghalaya bad ka kynhun jong ka Ministry of Development of North Eastern Region, ban khmih ïa ka jingpyllait ïa ki projek kam pynroi. U la khmih ïa ka rukom pyntreikam ïa ki projek bad ban jur ïa ka jingkongsan ban pynneh pynsah ïa ka jinglong jingman ki sawdong sawkun jong ka mariang bad ïa ka kam jngohkai ban plie ïa ki jinglah bad ïa ka jingkhlaiñ bor pura jong ka jylla Meghalaya”.
Ka jingban jur halor u shynrai Lakadong uba dei uba khlaiñ ha ka rong ka rup bad ban pynneh pynsah ïa ki rukom shna tynrai ka la pyni ïa ka jingïaid kaba la pynwandur bha ban kyntiew ïa ka kam jngohkai ha ryngkat bad ka jingkyntiew lang ïa ka kolshor tynrai bad ïa ka rukom im.
Ka jingthmu ban pynbiang ïa ka leit ka wan ha ki thaiñ nongkyndong bad ïa ki jingtei bapher bapher, ka dei kaba la khmih lynti ym tang ba kan khring ïa ki briew kiba nabar hynrei kan thaw ruh ïa ki kabu ki ban neh ha ka kamai kajih ha kylleng ki jaka bad ki shnong kiba rit jong ka jylla Meghalaya.
