Shillong, Ïaïong 24
Ka Bethany Society Shillong ha ka jingïatreilang bad ka ‘Enable India’ ha ka 24 tarik Ïaïong, 2025 ka la pynlong ïa ka ïew ïadie-ïathied bad kaba ai jinghikai ruh ïa kiba don jingduna ha ki dkhot met ïa kaba la tip kum ka ‘Hat Jingkyrsiew’ ne ka ‘Jagruthi Mela’ kaba la ïashimbynta da 500 ngut ki briew kiba duna ha ki dkhot met ryngkat bad ki bahaïing-bahasem jong ki kaba la pynlong hapoh ka phyllaw jong ka Bethany Society kaba don ha Laitumkhrah, Shillong.
Ha katei ka sngi, la pyni paidbah ïa ki tiar-ki tar kiba la shna bad pynwandur da ki briew kiba don jingduna ha ki dkhot met.
Ha katei ka sngi u Kongsan u dei u Myntri ba dei khmih ïa ka tnat Social Welfare ka Sorkar Jylla, Bah Paul Lyngdoh ha ryngkat ka jingïadonlang ka Director jong ka Tnat Social Welfare, ka Kong CD Lyngwa, u Director ka Enable India, Guru Prasad, u Director ka Livelihood Bethany Society, Ricky Renthlei nalor kiwei-kiwei.
Haba ai jingkren ha katei ka sngi, u Bah Paul Lyngdoh u la ong ba ka long kaba donkam ban kynmaw ba baroh ki long kiba la shah kyrkhu ha la ki jong ki bynta bad ym dei ban don ïa ka jingsngew ba kim long kiba don jingmyntoi tang namar ba ki don jingduna ha ki dkhot met namar ki briew kiba don jingduna ha ki dkhot met ruh, ki don ïa la ki jong ki jingmyntoi bad kim dei ban sngewpher.
“Ki don bun napdeng jong ngi kiba don ïa ka jingïohi kaba shai lyngba ki khmat hynrei ngim don ïa ka jingïohi jngai. Ki don bun napdeng jong ngi kiba lah ban ïohsngew hynrei ngim lah ban sngap. Ki don bun napdeng jong ngi kiba lah ban kren hynrei ngim ju kyrkhu. Ki don bun napdeng jong ngi kiba don ïa ki kjat hynrei ngim jam shakhmat bad mano pat ba pyndkoh ïa ki?,” ong u Bah Paul.
Kumjuh, u Bah Paul u la ong ruh ba ki briew ki ju pyrshah beit ïa kaei-kaei kaba ka Sorkar ka leh wat haba don kano-kano ka jingsniew ha ka mariang ruh ki kynnoh ïa ka Sorkar.
Nalorkata, u la pynbna ruh ba la aiti T.76 lak kum ka Grant-in-Aid sha kane ka Society khnang ba kan dang lah ban pyntyllun ïa la ki kam-ki jam.
Na ka liang ka Executive Director jong ka Bethany Society, Kong Bertha G. Dkhar haba kren sha ki lad pathai khubor, ka la ong ba ka kane ka prokram ka dei ban pynïadei ïa kiba ai kam bad kiba shah ai kam na ka bynta kiba duna dkhot met kaba kynthup ruh ïa ka jingai jingïarap kaba kloi lyngba ka jinghikai, ka jingbha-jingmiat ha ka imlang-sahlang, ka jingsumar ïa ka koit-ka khiah bad ban ïarap lada don kino-kino kiba ki kwah ban ïarap, bad ka ïarap ruh ia ki ban seng kam lajong bad ban kamai dalade.
Ka Kong Bertha ka la ong ba katkum ka khanasamari jong u snem 2011, ka Jylla Meghalaya ka don 44,317 ngut ki briew kiba duna ha ki dkhot met. Kumta ka long kaba donkam ban nang pynbha ïa ki lad jingïarap kiba kum kine ki rynsan ai jingïarap na ka bynta kiba duna dkhot met bad ki bahaïing jong ki ban ïoh ïa ki jinghikai ba kin lah ban ïoh ïa ki kam-ki jam ha kano-kano ka bynta kaba ki lah ban ïoh.
Na ka liang u Guru Prasad, Director ka Enable India, u la ong ba ka jingthmu jong ka ‘Mela Hat Jingkyrsiew’ ka long ban kyntiew ïa kiba don jingduna ha ki dkhot met ban ïeng ha la ki jong ki kjat na ka bynta ki sap kaba ki don.
