Kyiv, Iaiong:
Katkum ki khubor la ong ba 2 ngut ki briew ki la duh ei ia ka jingim bad 54 ngut ki la mynsaw na ka jingleit thombor jong ka Russia da ki ‘namding sha Ukraine ha ka step jong ka Sngi Palei.
Ki bor pynïaid ka Ukraine ki la pynmih ia ka jingpynbna halor katei ka jingleit thombor biang jong ka Russia da ki ‘namding ha katei ka sngi bad ki nongthoh khubor jong katei ka ri ruh ki la sakhi ba ki la iohsngew ia ki jingsawa jam jong ka jingbthei ki ‘namding ha kylleng jong katei ka nongbah ba ka Russia ka leit thombor ha katei ka sngi.
Hadien katto katne kynta, u Mayor jong ka nongbah Vitali Klitschko u la pyntip ba 2 ngut ki briew ki la khlad noh na katei ka jingjia bad kumba 54 ngut kiwei pat ki la mynsaw. 38 ngut napdeng jong kitei kiba mynsaw, ki kynthup ïa 6 ngut ki khynnah bad ki don hapdeng ka jingsumar ha ki hospital ba la pynkit ia ki.
Ha ka jaka rieh bom kaba la buh ha ka jaka ba shapoh jong kawei ka ïing sah briew, palat shi- spah ngut ki nongshong shnong ki la ïalum lang hadien ba la iohsngew ia ka jingriew ki siren kiba pyni ia ka dak jong ka jingma kaba khraw ha katei ka nongbah.
Ka Kyiv ka la shah siat khatduh ha ki namding ha kaba sdang jong u Lber ha kaba 3 ngut ki la mynsaw ha katei ka jingjia.
Sha ka phang Mihngi jong ka Ukraine, ka nongbah Kharkiv ka la shah thombor kumba 6 tylli ki ‘namding kiba leit bthei , ong u Mayor jong ka nongbah Igor Terekhov bad bynrap kham hadien ba “ka jinghiar thma kaba jur da ki drone” ha katei ka nongbah ka dang ïaid shakhmat.
U Andriy Yermak, nongïarap ba ha khlieh duh jong u President ka Ukraine,Volodymyr Zelensky, ha katei ka sngi u la pyntip ba ka Russia ka la hiar thma ïa ki katto katne ki bynta jong ka Ukraine kiba kynthup ia ka nongbah Kyiv, ka Kharkiv bad kiwei de ki thaiñ ba marjan.
Kumta, utei u heh u la ong ba u Putin u pynpaw tang ia ka jingkwah ban pyniap dusmon bad kane ka jingleh jong u ka dei ban shah khanglad noh shi syndon bad ki dei ban ieng ban pyni beit noh da kaba tyngeh namar ka jingbym suitñiew jong u ia ki mynsiem briew ba lui-lui.
