Shillong, Ïaïong 24
U Myntri Rangbahduh ka ri India, Narendra Modi, u la pynrem tyngeh ïa ki kam pyntriem ba shyrkhei jong ki lehnoh kiba la shim ïa ka jingim jong 26 ngut ki mynsiem ba lui-lui kiba leit jngohkai ha Pahalgam, Jammu & Kashmir ha ka Sngi Ba-ar ka 22 tarik Ïaïong, 2025.
Haba ai jingkren ha ka jingïalang kaba long ha Bihar, u Modi u la pyntip sha ka pyrthei baroh kawei ba ka India kan sa ithuh ïa kine ki lehnoh bad kan sa wad ban pynshitom ïa uwei-pa-uwei u lehnoh bad ïa ki nongkyrshan jong ki.
“Nga pyntip ïa kane, sha ka pyrthei baroh ba ka India kan ithuh, kan wad bad pynshitom ïa uwei-pa-uwei u lehnoh bad ïa ki nongkyrshan jong ki,” la ong u Modi.
“Ngin buddien ïa ki shaduh ba kut jong ka pyrthei, ka mynsiem jong ka ri India kan ym shah pynpait pynpra noh ha ki kam lehnoh. Ka kam lehnoh kan ym lait khlem ka jingshah pynshitom. Ka ri baroh kawei kan ïeng tylli ban pyllait na kane ka jingeh. Baroh kiba ngeit ha ka longbriew manbriew kin don bad ngi. Ka jingpynshitom kan long da kaba tyngeh kaba ki lehnoh ruh kin ym lah ban mutdur satia,” la bynrap u Modi.
