Shillong, Ïaïong 24
Ka Greater Shillong Water Supply Scheme (GSWSS) Phase-III, ka skhim sam sum ïa ka sor Shillong kaba la ïaid mynta palat phew snem ka dang sahteng shi sahteng na ka por sha ka por. Kane ka la long ka daw kaba pynktha khlieh ïa ka tnat Public Health Engineering (PHE) kaba peit bad pyntrei ïa kane ka skhim.
Kane ka skhim kaba la khmih lynti bha da ki nongshong shnong ka la ïatyngkhuh ïa kiba bun ki jingtynjuh kiba pynlong sha ka jingnang shimpor ban dep.
U Myntri ba khmih ïa ka tnat Public Health Engineering (PHE), Marcuise N Marak haba pyntip ïa kane ka jingsahteng jong ka GSWSS, u la ong ba ka jingpyntrei ïa ki kam ki dang ïaid shakhmat ban lah pyndep ïa kane ka skhim.
U la ong ba wat la ka tnat ka la sdang ban pyntrei stet ïa kane ka skhim, hynrei ka la sahkut namar kiba bun ki daw bad ki jingmih bun ki jyrwit-jyrwat hapdeng ka jingpyntrei.
Katkum ka jingong u Myntri, ka daw ba nyngkong ka dei ka jingduna pisa kaba la mang ban pynlut ïa kane ka skhim, ha kaba ka Sorkar ka hap ban mang pisa biang, hadien kane ka mih sa ka jingïatyngkhuh ha kaba ïadei bad ka jingpynïaid ïa ki pipe ha surok ka PWD, ka jingbit na ka tnat Forest, na ka Cantonment bad kiwei-kiwei ki daw.
“Kawei na ki ka dei namar ka pisa ba la mang ïa ka project kam pat dap satia. Ngi hap ban shim ïa ka pisa na ki tyllong bapher-bapher. Hadien kata, haba pyntreikam ïa ka skhim, ki la mih biang ki jingeh kiba kynthup ïa ka kam jaka puta, ka jingai jingbit na ka tnat Forest, na ka Cantonment bad kiwei-kiwei,” u la ong.
U Marcuise u la ong ba haduh mynta ka projek ka la mad da ki jingtynjuh suda, ha kaba ka tnat ka hap ban tih ïa ka surok ban ïoh siang ïa ki pipe um, bad pynpaw ba kine ki dei ki daw kiba pynlong ban slem ka jingpyndep ïa kane ka projek.
Haba kylli halor ka jingbym ïatreilang hapdeng ka PHE bad PWD, u Myntri u la ong ba kane ka dei ka kam kaba hap ban pynbeit bha biang.
