Jowai, Ïaïong 24
Ka Jingïaseng Samla Balang Presbyterian Mustem ha ka 23 tarik Ïaïong ka la sdang ïa ka jingrakhe dap 75 snem ne Platinum Jubilee naduh ba la sdang ïa ka ha u snem 1950.
Kum ka dak jong ka jingpynsah jingkynmaw ïa ka Jingïaseng samla ha ryngkat ka jingïatreilang bad ka Balang baroh kawei la plie ïa u mot sah jingkynmaw da u Tbn O.B. Huwa Moderator Jowai Presbytery.
Nalorkata, la pyllait ruh ïa ka Momento da u Tbn. M.L. Pyrtuh Chairman jong ka Jingïaseng Samla District bad ka jingpynher ïa ka lama Jubilee da u Tbn. H. Shylla Chairman Balang.
Ha kane ka jingrakhe Platinum Jubilee la pynlong ruh ïa ka jingïaseng kyrpang hapoh ka ïingmane jong ka Balang ba la pynïaid da u Iahmeheibha Ladia Chairman Jingïaseng Samla bad la ïoh ka jingpule bad duwai na u Tuboimi Nongpluh bad ïa ka khana lyngkot jong ka Jingïaseng Samla la iathuh da u Secretary Yozarky Khlem.
La pynphuh pynphieng iaka jingiaseng da ka jingrwai Choir na ki Jingïaseng Samla jong ka Balang bad ka jingïasyllok na ka ktien jong U Blei da u Rev. E. Nongpluh.
U Rev. E. Nongpluh ha ka jingïasyllok u la kren halor ka phang ‘U Khrist ha phi ka Jingkyrmen ka burom”. U la ong u Khrist u long ka jingkyrmen ym tang na ka bynta kaba mynta hynrei ka ban sa wan ruh.
U la kyntu ruh ïa ki nongïalam jong ka Jingïaseng Samla ba haba ki long kum ki nongïalam kim dei ban shaniah tang ha ka bor jong ka jingstad briew hynrei kaba kongsan ka long ban shaniah ha U Blei khnang ba kin lah ban ïalam ïa ka Jingïaseng Samla katkum ka mon jong U Blei.
U la kitbok kitrwiang ruh ïa ki khun samla ka Balang ba lyngba kane ka Jubilee kin ïoh mad shisha ïa u Khrist ha ka jingim ka jong ki bad kin long ki samla kiba shaniah bad aiti lut ha U Blei.
