Guwahati, Ïaïong 24
U Aminul Islam uba dei u MLA ka All India United Democratic Front (AIUDF) na Dhing Konstitwensi, ha ka sngi Palei u la shah kem noh ha ki pulit ka Nagaon halor ka jingkynthoh jong u ha ka jingjia thombor ki lehnoh ha Pahalgam bad Pulwama.
U Aminul Islam u la kynthoh bad kam ïa kane ha ki rynsan ‘social media’ ba ka jinghiar thma jong ki lehnoh ha ka 22 tarik u Ïaïong ha Pahalgam, Jammu bad Kashmir- kaba la shim ïa ka jingim jong 26 ngut ki nongwan jngohkai pyr-thei Hindu, bad ka jingshah thombor jong ki Central Reserve Police Force (CRPF) ha Pulwama ha u Rymphang 2019, ka dei ka jingsuhbuit bad ïasylla da ka Sorkar.
Kane ka jingkynthoh jong u, ka la saphriang sted bha ha ki rynsan social media, uba la shah kynthoh jur bha namar ba ka la ktah matïong bad kane ka lah ban pynmih ka jingïakynad hapoh ka ri.
Halor kane ka jingkynthoh bad kynnoh kaba la saphriang sted ha ki rynsan social media, ki pulit ka Assam ki la ujor da ka suo motu pyrshah ïa u Islam. “Halor ka jingkren kaba ïalam bakla bad pynkhihwin da u MLA ka Dhing, u Aminul Islam hakhmat ki paidbah, kaba la saphriang bha bad kaba don ka lad ban wanrah ïa ka jinglong jingman kaba sniew, la register case da ka thanad Nagaon na ka bynta ki kam runar bad la kem ïa u,” la ong ki pulit Assam ha ka jingthoh ha ka rynsan X.
Haba pyntikna ïa kane ka jingshah kem kaba la thoh ha ka X, u Myntri Rangbah ka Assam u Himanta Biswa Sarma u la kdew, “Kane ka jingkren kaba la kynthoh halor ka jingshah thombor ka dei kaba la thmu da ka BJP ka la mih ka jingbitar bad ka jingïakynad hapdeng ar kynhun ka ban lam pat sha ka jinglong jingman kaba sniew.
Ïa u Islam la kem na ka ïing sah ka jong u bad la pynngat ïa u ha kiba bun ki kyndon jong ka Bharatiya Nyaya Sanhita (BNS), ba kynthup ïa ka Sections 152, 196, 197(1), 113(3), 352, and 353 – bad kaba nyngkong eh dei bad ka jingpynkhih win, ki kam pyrshah ri, bad ka jingpynthut ïa ka shongsuk shongsaiñ paidbah.
Kane ka jingshah kem ka dei kaba nyngkong ha Assam pyrshah ïa ka jingkynnoh donkti saiñ pyrthei kaba lah ban mih ka jingsngewpher niam hadien ka jingjia shah hiar thma ha Pahalgam, ha kaba ki tnat syntiat ki la pynthikna ba ka dei ka jingshah thombor ba la kyrshan da ka Pakistan.
Shuh shuh u Myntri Rangbah ka Assam haba thoh ha kawei ka post, u la ong, “Ka Assam kan shim ïa ka sienjam ba tyngeh pyrshah ïa kito kiba nud ban ïada halor ka jingshah hiar thma ba shyrkhei ha Pahalgam. Ai ba kin tip shai bha: Kito ki briew kiba kwah ai daw halor katei ka jingjia halor ka jingshah pynïap ba shyrkhei jong ki mynsiem ba lui lui kim dei kiba ki pyndonkam hok ban pynpaw ne freedom of expression-Hynei ki ïeng pyrshah bad ki mynsiem kordor ba la duh noh jong ka India.”
Katba na ka liang jong u nongïalam ka AIUDF u Maulana Badruddin Ajmal u la pynjngai ïa ka seng na ka jingkren u MLA bad ong ba ka seng ka ïeng bad ka Sorkar. “Ka jingkynthoh jong u Aminul kam dei ka rai jong ka seng. Ngi la dep ban pynshai ïa ka nongrim ba ngi ïeng mynta ka sngi ha ki kot khubor,” ong u Ajmal, bad bynrap ruh, “Ha kum kane ka por ngi dei ban ïeng lang bad ka Sorkar namar ki lehnoh ki kim don niam bad kiba pynphriang ïa ki kam lehnoh ki long pyrshah ïa ka niam Islam. Ki pynjah burom ïa ka niam Islam bad ki Muslim. Ka jingkren jong u Aminul Islam kam dei ka jingkren jong ngi,” la ong u Ajmal.
