Shillong, Ïaïong 24
Ki pulit Special Cell jong ka East Khasi Hills, Shillong ha ka sngi Palei ki la kem noh ïa uwei u briew ba la tip kyrteng da u Simon Shylla (30 snem) na ka ïingsah jong u kaba don ha Umlyngka.
Katkum ka kyrwoh khubor na u Superin-tendent of Police ka East Khasi Hills, Bah Vivek Syiem, la ong ba ka jingkem jong ki pulit ïa u, ka long hadien ba la ïoh jingtip ba u la kynthoh pyrshah Ri (Anti National) bad ïaroh ïa ka kam pyntriem ki lehnoh ha ka ‘facebook’ account jong u ba la ai kyrteng “Man Shylla”, kaba buh jingma ïa ka jingïalong kawei bad ka jingïatylli jong ka Ri.
Kane ka jingkynthoh pyrshah Ri jong une u briew ka dei halor ka khubor ba la pynmih da kawei ka lad pathai khubor ka thaiñ Shatei Lam Mihngi, ka Northeast Live halor ka jingjia shah siat ïap jong 28 ngut ki nongjngohkai ha ki lehnoh ha Pahalgam, Jammu & Kashmir, ha kaba u la kyrshan ïa ki lehnoh kiba la pynïap ïa ki nongjngohkai bad pynshlur ïa ki ban leh kum kane kajuh ka kam pyntriem ïa kawei ka jaidbynriew kaba don ha kane ka thaiñ Shatei Lam Mihngi.
Shuh shuh nalor ka jingkem ïa utei u briew, ki pulit ki la kurup noh ruh ïa 2 tylli ki mobile phone jong u bad ïa ka mukotduma la ujor ha thanat Lumdiengjri bad ha kaba la pynngat ïa u hapoh ki kyndon aiñ U/s 113(3)/196(1)(a)/147 BNS.
Na ka liang u SP u la pyntip ruh ba ha ka sngi Thohdieng yn rah ban tian bishar ïa u ha ïingkashari.
