Imphal, ïaïong:
Ki ‘riew sniew bym shym la lah ban ithuh ki dei kiei ha ka step jong ka sngi Balang ki la thang ïa ki katto katne tylli ki ïing ha ki ar tylli ki shnong Kuki jong ka distrik Kamjong jong ka Manipur, kaba bun ki Naga, kaba la pynlong ïa ki bor synshar ban pynjari da ki hukum ban pyntreikam ïa ki jingpyrkhing hapoh ka kyndon 163 jong ka BNSS.
Kane ka jingthombor ka dei kaba la jia ha ka shnong Gampal bad Haiyang, kaba don hajan khappud ka Myanmar. Kiba bun na ki nongshong shnong ki don shabar ha la ki lyngkha ha ka por ba jia katei ka jingshah thombor.
Ha ka hukum, u District Magistrate u Rangnamei Rang Peter u la ong ba la pynjari ïa ki hukum khang namar ba kum kine ki jingpynkulmar ki lah ban wanrah ïa ka jingpynkheiñ kaba jur ïa ka shongsuk-shongsaiñ, kaba buh jingma ïa ka shongsuk shongshngaiñ jong ki paidbah, bad kaba buh jingma ïa ka jingim briew bad ka jingdon jingem.
Kane ka hukum, ka la khang pyrshah ïa kino kino ki briew, ba kin ïaid shabar jong ki jaka sah jong ki bad ïa kino kino ki kam ne ki kam kiba lah ban pynthut ïa ka suk ka saiñ ha ka thaiñ.
Katto katne tylli ki seng Kuki-Zo, kynthup ïa ka Kuki Inpi Manipur bad ka Kuki Students’ Organisation, ki la pynrem ïa kane ka jingjia bad ki la dawa ban shna thymmai noh mardor ïa kine ar tylli ki shnong, kynthup ïa ka jingpynbha pat ïa ki longïing kiba la shah ktah bad ban siew bai lutksan kaba hok ïa ki jingduhnong kiba ki la mad.
Shuh shuh, ki la dawa ban buh ïa ki briew kiba biang jong ki “bor pahara ba khlem shah liang” ban pynthikna ïa ka jingshngaiñ jong ki nongshong shnong bad ban ïada na ka jingshah thombor kaba kham jur. Kawei pat ka jingdawa ka long ban pynbiang ïa ki tiar kiba donkam, kynthup ïa ka bam, ka jingïarap ha ka liang ka koit ka khiah, bad ka jaka sah ïa baroh kito kiba la shah pynkynriah jaka ne kiba shah ktah.
“Kine ki jingshah thombor kiba shyrkhei ki la pyntieng ïa ki riew paidbah Kuki kiba shida bad sa shisien pat ki la buh jingma ïa ka jingsuk bad jingshong suk shongsaiñ kaba la phet lypa ha ka thaiñ,” ong ki seng ha ka jingpynbna ba la phah lang.
“Ngi kyntu ïa ka sorkar ban leh kloi, khlem shah liang, bad ka jinglong hok. Ki paidbah jong ka Gampal, Haiyang bad ka jaitbynriew Kuki-Zo kaba kham heh ki dei hok ym tang ban ïoh ïa ka jingïada, hynrei ruh ïa ka hok bad ka jingsuk,” la ong ka jingthoh ba la phah.
