Shillong, Ïaïong 24
Uwei u rangbah u la duh noh ïa la ka jingim hadien ba la kynnoh ba u la shah thombor da ka wait ha u khun jong ka kurim ka jong u.
Katkum ka khubor kaba la ïoh na ki pulit la ong ba ka Kong Mel Dkhar ka la ai jingujor ba ka miet jong ka 17 tarik mynta u bnai, kata ha ka por kumba 10.30 eiei, u khun jong ka, uba la tip kyrteng kum u Loris Dkhar (33 snem) u la thombor ïa u kurim jong ka, Bah Tngen Phawa da ka wait ha ka ïingsah ka jong ki, kaba don ha ka shnong Mupyut ha West Jaiñtia Hills.
La ong ba ha kane ka jingjia, utei u kurim ka Kong Mel Dkhar, u la mynsaw jur bad mar-mar la pynkit noh sha PHC Jaraiñ bad nangne la bthah ban pynkynriah noh sha Civil Hospital Ïalong.
Hynrei la ong ba ha ka 21 tarik mynta u bnai, ka kurim ryngkat bad ki bahaïing jong utei u briew ba la shah thombor, ki la kit noh ïa u sha ka ïingsah jong ka para kaba don ha katei ka shnong hynrei ha ka sngi kaba bud ka 22 tarik, utei u briew u la khlad noh.
Ha kaba ïadei bad kane ka jingjia, ki pulit ki la kem noh ïa utei u briew uba la thombor bad ka jingtohkit ka la ïaid shakhmat ban lap ïa ki jingshisha bad ki daw halor katei ka jingjia.
